Iina wan ripuot fi Juun 2022, di prezident fi di Worl Bangk Gruup se: “Di worl de iina moni prablem agen. An nou a no onggl dier tingz a get diera, bot di bizniz dem a tek lang fi staat op an dem a tek lang fi staat mek moni tu.”

 An di Intanashinal Moniteri Fon mek wi nuo se “gyas an ail prais an fuud prais dis a gu op so, an a di puo konchri dem it lik di muos an di puo piipl dem we iina dem konchri de.”

 Bot di Baibl mek wi nuo wa mek wi a go chuu dem aad taim ya, it mek wi nuo wa wi kyan du fi diil wid dem prablem ya, an it mek wi nuo wen dem prablem ya a-go don we wid fi gud.

•   Di Baibl se wi a liv iina “di laas die dem” ya nou.—2 Timoti 3:1.

•   Jiizas did se kaaz a di ting dem we a-go apm iina dem taim ya, “piipl a-go fried.” (Luuk 21:11) So wen tingz a gu op an a get diera an diera, it mek piipl fried kaa dem staat fi wori an fret bout wa a-go apm tu dem iina di fyuucha an staat wori wori ef dem kyan go tek kier a dem fambili.

•   Iina di Baibl, Revilieshan mek wi nuo se fuud prais naa go tap gu op. It se: “Den mi ier sopm laik wan vais . . . se, ‘Wan poun a biekin flowa a-go kaas wan uol die pie, an siks poun a kounta flowa a-go kaas wan uol die pie.’”—Revilieshan 6:6.

 Fi lorn muor bout “di laas die dem” an bout wa Revilieshan se wuda apm iina dem taim ya, wach di vidiyo we niem Fram 1914 Til Nou, Di Worl A No Di Siem an riid dis: “The Four Horsemen—Who Are They?”

•   “Dem a-go bil ous an liv iina dem, an dem a-go plaant op dem griep faam, an dem a-go get fi enjai wa dem wok aad fa. Dem naa go bil ous fi sumadi els ton roun liv iina it, an dem naa go plaant tingz fi ada piipl nyam.”—Aizaiya 65:21, 22.

•   “Uol iip a fuud a-go de pan di ort; it a-go ron uova fram aafa di tap a di mountn dem.”—Saam 72:16.

•   Saam 12:5 mek wi nuo se Jeuova a-go du sitn fi elp di puo piipl dem we a baal out fi elp kaa im si ou dem a sofa an ou laif aad fi dem. a

 Kaaz a di wikidnis we a gwaan nou, it mek som piipl av moni an som na’av non. Gad suun get rid a aal a dem wikidnis ya we a gwaan, an a evriwe im a-go get rid a wikidnis. Fi lorn muor bout dis, riid dis: “Is a Fair Economic System Possible?”

 Bot yu nuo se iivn duo tingz so aad ya nou, di Baibl kyan stil elp wi fi go chuu. Ou it kyan elp wi? It tel wi tingz we wi kyan du so dat wi kyan yuuz di likl moni we wi av iina di bes wie. (Pravorbz 23:4, 5; Iikliiziyastiiz 7:12) Fi lorn muor, riid dem ya: “Protect Your Livelihood” an “How to Live on Less.”