Som piipl kaal demself viigan. Dat miin se dem no waahn fi av notn fi du wid tingz we kom fram animal, an muo an muo piipl aal uova di worl waahn nuo muo bout dis.

•   “Wen piipl se dem a kip we fram tingz we av fi du wid animal, it miin se so langks dem kyan dwi’it, dem no waahn fi ort di animal dem ar fi piipl yuuz di animal dem fi get fuud, kluoz, ar eniting laka dat.”—The Vegan Society.

 A no onggl kaa dem kier bout di animal dem mek som piipl mek op dem main fi kip we fram tingz we kom fram dem. Som piipl dwi’it kaaz dem kier bout wa a gwaan wid di ort, kaaz dem fiil se it gud fi dem badi, ar kaaz a dem rilijan.

•   “Fi di wan dem we mek op dem main fi no av notn fi du wid tingz we kom fram animal, a no jos kaa dem no laik fi nyam sortn an sortn tingz. Dem dwi’it kaa dem biliiv se it rang fi piipl nyam tingz ar yuuz tingz we kom fram animal, an piipl fi tap du dat so dat di worl kyan chienj fi di beta.”—Britannica Academic.

 So yu tingk se di onggl wie wi kyan mek tingz beta fi di ort a fi piipl no av notn fi du wid tingz we kom fram animal? Wa di Baibl av fi se bout dis?

 Di Baibl mek wi nuo se Jeuova Gad  a mek piipl fi kanchuol di animal dem an tek kier a dem. (Jenisiz 1:27, 28) Afta likl taim, Gad did tel piipl se, ef dem waahn, dem kuda aal nyam di animal dem tu. (Jenisiz 9:3) Bot im no waahn nobadi fi a chriit di animal dem bad ar a du wikid tingz tu dem.—Pravorbz 12:10.

 Azkaadn tu wa di Baibl se, evribadi fi mek op dem uona main ef dem a-go nyam miit ar dem naa go nyam it. b An Gad no tingk se sumadi beta dan sumadi els jos kaa dem mek op dem main fi nyam miit ar no nyam it. (1 Korintiyan 8:8) So nobadi no fi joj sumadi els bout wa dem mek op dem main fi nyam.—Ruoman 14:3.

 Di Baibl mek wi nuo se wa wi mek op wi main fi du iina wi uona laif, a no dat a-go fiks di prablem dem iina di worl. Nof a di prablem dem we de iina da worl ya a kaaz a palitiks, ou piipl chriit dem wan aneda, an ou tingz set op iina di worl wen it kom aan tu bizniz an moni an dem ting de, so piipl kyaahn fiks dem de. Di Baibl tel wi se:

•   “Wa gaan bad a maanin kyaahn kom gud a iivnin.”—Iikliiziyastiiz 1:15.

 A Gad a-go get rid a aal a di prablem dem we de iina da worl ya. Di Baibl mek wi nuo wa tingz a-go komiin laik wen Gad du dat.

•   “Den afta Gad don joj evribadi, mi si wan nyuu evn an wan nyuu ort, kaaz di fos evn an di fos ort did disapier, an di sii did disapier tu.”—Revilieshan 21:1.

 Gad a-go get rid a di govament dem we man a ruul an dat a wa di Baibl kaal “di fos evn,” an im a-go mek fi’im Kindom govament ruul, dat a wa di Baibl kaal di “nyuu evn.” Da govament de a-go get rid a aal a di wikid piipl dem an dat a wa di Baibl kaal “di fos ort,” an it a-go ruul uova “wan nyuu ort,” an dat a aal a di piipl dem we redi fi du wa Gad se dem fi du.

 A onggl wen Gad Kindom a ruul uova di wol ort piipl a-go lorn ou dem fi riili tek kier a di animal dem an aal a di ada sitn dem we Gad mek an put pan di ort.—Aizaiya 11:6-9.