Aal uova di nyuuz yu ier piipl a se bad tingz bout piipl kaaz a dem skin kola ar we dem kom fram ar dem a du bad tingz tu dem kaaz a dem rilijan ar ou dem chuuz fi liv dem laif, an wi ier uol iip a nyuuz bout waar we a gwaan aal uova di plies.

•   “Wi si se nof muor piipl a se aal kain-a wikid tingz bout piipl pan di intanet fram di waar bitwiin Izrel an Gaaza staat an kaa dem a lisn tu di wan dem we a push aal kain-a wikidnis wen it kom aan tu da waar ya.”​—The New York Times, Novemba 15, 2023.

•   “Fram Aktuoba 7, a uol iip muor piipl wi si a iet dem wan aneda an a se som wikid tingz bout piipl kaaz a dem skin kola ar we dem kom fram an dem a du som wikid tingz tu dem tu kaaz a dat, an dis no gud at aal.”​—Dennis Francis, prezident fi di United Nations General Assembly, Novemba 3, 2023.

 A no jos nou piipl a se bad tingz bout piipl an a fait gens dem wan aneda. Di Baibl tel wi bout som piipl we iina dem taim de, dem did a se aal kain-a wikid tingz tu ada piipl an dem did eva a push waar an badnis. (Saam 64:3; 120:7; 140:1) Bot it did mek wi nuo se di wie ou piipl iet dem wan aneda nowadiez, wuda tel wi sitn bout di taim we wi a liv iina.

 Di Baibl tel wi tuu tingz we mek wi nuo wa mek so moch piipl iet dem wan aneda nowadiez.

1.  1. It did mek wi nuo se wan taim a-go kom wen “muo piipl aat a-go ton kuol an dem naa bada lov piipl laik wan taim.” (Matyu 24:12) So insted-a fi a shuo lov tu dem wan aneda, muos a di piipl dem nowadiez wudaana du tingz we a-go jos mek dem iet dem wan aneda muor.​—2 Timoti 3:1-5.

2.  2. A di wikid sitn dem we Sietan a du a mek so moch piipl iet dem wan aneda. Di Baibl mek wi nuo se “di devl kanchuol di uol worl.”​—1 Jan 5:19; Revilieshan 12:9, 12.

 Bot wan neda ting we di Baibl tel wi se a dat suun suun Gad a-go get rid a di sitn dem we a mek piipl iet dem wan aneda. An yu si aal a di pien an sofarin we piipl go chuu kaaz a dat, im a-go get rid a dat tu. Di Baibl se:

•   “Gad a-go waip dem fies an jrai op aal a dem yai-waata. Nobadi naa go ded agen, so nobadi naa go ala ar baal. An nobadi naa go fiil no pien, kaaz dem uol taim sitn de don we wid.”​—Revilieshan 21:4.