Iina Julai 2022, wi ier bout som difrant difrant konchri aal uova di worl we di plies get ata dan naamal:

•   “A di sekan taim nou fi da mont ya wan piis a iit we no naamal lik Chaina, an dem waan di piipl dem iina 70 a dem siti dem bout it.”—Julai 25, 2022, CNN Wire Service.

•   “Iina Yuurop dem a av som torbl torbl faiya iina di faris dem kaaz wan piis a iit we no naamal a lik nof a di konchri dem.”—Julai 17, 2022, The Guardian.

•   “Pan Sonde wan piis a iit we neehn naamal lik uol iip a di siti dem iina som difrant difrant paat a Merika.”—Julai 24, 2022, The New York Times.

 So wa aal a dis miin? Yu tingk wan taim eva gweehn kom wen nobadi kyaahn go liv pan di ort? Wa di Baibl av fi se bout dis?

 Ye man. Dem piis a iit de we no naamal we a lik piipl aal uova di worl, di Baibl did mek wi nuo se dem tingz ya wuda gwaan iina fi wi taim. Jiizas did mek wi nuo se iina dem taim ya ‘som torbl sitn a-go kom an piipl a-go fried.’ (Luuk 21:11) So kaa di taim a get ata an ata aal uova di worl, wol iip a piipl staat fret se di taim a-go kom wen di ort a-go mash op an nobadi naa go kyan liv pan it.

 Nuo sa. Gad did mek di ort fi piipl liv pan it fi eva. (Saam 115:16; Iikliiziyastiiz 1:4) So im naa go mek piipl mash op di ort so dat nobadi kyaahn liv pan it. Insted-a dat, im se im a-go “mash op di piipl dem we a mash op di ort.”—Revilieshan 11:18.

 Mek wi luk pan tuu tingz we di Baibl tel wi se Gad a-go du fi di ort:

•   “Di plies we ful op a bier bush an di lan we jrai bad, tingz a-go staat gruo de, aal som priti flowaz. An iina di dezot, flowaz a-go gruo an blasom de.” (Aizaiya 35:1) So Gad naa go mek di ort ton iina wan jrai uol dezot we nobadi kyaahn go liv iina. Wa im a-go du a dat, im a-go fiks aal a di paat dem pan di ort we mash op.

•   “A yu a tek kier a di ort, an kaaz a dat di grong kyan gruo nof tingz we a bier uol iip a fuud.” (Saam 65:9) So wi si se Gad a-go ton di ort iina wan paradais.

 Fi lorn muor bout ou di weda a chienj op chienj op aal uova di worl an wa dis av fi du wid tingz we di Baibl se wuda apm bifuo dem apm, riid dis: “Climate Change and Our Future—What the Bible Says.”

 Fi fain out muor bout wa di Baibl se bout wen evriting pan di ort staat wok ou it fi wok an di ort get bak nais an gud agen, riid dis: “Who Will Save the Earth?”