2023 uwi juareajnia jui iisha penker pujustin wakeraji tura ii shuarsha penker pujuarat tusar wakeraji. Nekas penker pujuttaji urukamtai ainis enentaimsatniuitiaj?

 Yuusa chichamenka penker chichaman etsereawai, yamai itiurchat wainiajnia nuka jukerusan amuukartatui tawai. Nuna Yuusa chichame junis tawai: “Núnisaṉ ashí yaunchu Yus Papinium aarma iin jintintrámatniun áararmiayi. Nuja̱i̱ atsaṉtamkurin shiir wainkiattajnia nuka katsuntrar nákastatji” (Rúmanam 15:4).

•    Yuusa chichame tana nuna nukap nekaattsam wakerakmeka Uruma nui nekas penker pujuttaji tana nu aujsata.

 Yuusa chichame penker pujuttarme turameajnia nuka “Yusai̱ áchitkia asakrin ti kakaram emettamji” (Israernum [Hebreos] 6:19) Ukunmatai penker pujutin asar kakaram ajaji, yamaiya jui itiurchat wainiajnia nusha katsuntratniun yainmaji, wara warat enentaimkiur nekas warasar pujustinian yainmaji. Ju nekaata:

•    Aents awartiun ti umartinian wakerinian Yuusa chichame itiur yainmia nu nekaata. Wi najanman penke nakitramiajai nu video iista.

•    Ii shuar jakamtaisha Yuusa chichame itiura ikiakatmarminiaitiaj nu nekaata. Nii shuar jakamtai kuntuts pujuinia ikiakartin nu video iista.

 Nukap aents yaitmatainkia penker pujuttaji tu enentaimiainiawai tumaitkiusha nu aintsanka nankaamachuiti. Yuusa chichame tana nuka nekas imiatrusan nankaamawiti. Urukamtai? Yuusa chichamen tana nuka Jehová a tiniuiti. “Tura Nisha wáitruatniun tujintiawai” (Titiun 1:2) Jehovaka kakaram asa ni wakerana nuna mash turiniaiti (Yus Kanta [Salmo] 135:5, 6).

 Yuusa chichame tana nuka nekas uminkiattawai tu enentaimsamniaitme. Ainis tuke enentaimsattsam Yuusa chichame penker esetram unuimiarminiaitme (Túramuri̱ [Hechos] 17:11) Amesha kuitchajai Yuusa chichame unuimiartasam wakeramek? 2023 uwitin ainis turamniaitme.