Junio 2022 uwitin presidente del Grupo Banco Mundial chichaman etseru ashi nunkanam warinkisha ti kuitchikcha ajaki weawai ainis timiayi.

 Gasolina tura yurumkasha ti kuit ajaki wena asar nukap kuitian waitmainiatsna nuna itiurchat amajainiawai ainis Fondo Monetario Internacionalnum etserainiawai.

 Urukamtai ainis warinkisha ti kuit ajaki wena, itiurkaria katsuntramniaitiaj tura nusha iwiarnartimpiash nuna nekaatniun Yuusa chichame yainmaji.

•    Yuusa chichamenka amuukatin nuntumsamunam pujaji tawai (2 Timiutéun 3:1).

•    Amuukatin nuntumsamunam “ashamai nankaama waintiatrume” Jesús timiayi (Lucas 21:11 TNM). Warinkisha ti kuit ajaki weakui aentska ukunmataisha urukatin, wi shuarnasha penker wainkiamniashitiaj tu enentaimiainiak ashamainiawai.

•    Amuukatin nuntumsamunam yurumkasha ti kuit wainkiartiniuyania nuna Apukarípsis papii timiayi. Nui tawai: “Tsawant takamtsuk takaakmesha apatkuka peṉké ishichik sumakmin átatme” (Apukarípsis 6:6).

 Amuukatin nuntumsamunu tura Apukarípsis papiinium aarma irunna nuna nukap nekaattsam 1914 uwitin itiurchat ti nukap pampaarmiayi tana nu video iista tura Apukarípsis papiinium 4 kawainium eketka wenan aujmatna nusha warin ainia? tana nusha aujsata.

•    “Tura je̱a̱n je̱a̱mkar nui̱ṉ pujusártatui núnisaṉ úwan arakaar nuya̱nak neren yurumiartatui. Tura je̱a̱mainiaksha chíkich pujustinian je̱a̱mkachartatui núnisaṉ arakmainiaksha chíkich yurumátniun arakmachartatui” (Isayas 65:21, 22).

•    “Nuṉká pakari̱ncha murarí̱ncha árak núkap atí” (Yus Kanta [Salmo] 72:16).

•    “Kuítrinchasha wáitkiainiamu asamtai núnisan atsumainiasha útainia asamtai Wi wajatrattajai” tawai Jehová (Yus Kanta [Salmo] 12:5). a

 Kuitian achiakainiachu asar waitsar pujuarain tusa Yuus jukerusan nu itiurchatan iwiarattawai. Nusha itiurkan ainis turat, nu nekaattsam Kuitkia utsumtsuk pujustin atimpiash? tana nu aujsata.

 Yuus nu itiurchatan iwiarattana nu tsawan jeamam warinkisha kuitchikcha ajaki weana nuna katsuntratniun Yuusa chichame yainmakminiaiti. Nusha itiura? Kuit nankamas ajapashtinian jintintramamniaiti (Nekatai̱n Jintinkiartin [Proverbios] 23:4, 5; Eclesiastés 7:12 TNM). Nu nukap nekaattsam Kuitrum penker wainkiata tura Warumchijiain itiur pujusminiaitiaj? tana nu aujsata.