Tuke uwitin Testigos de Jehová menaintiu tsawan tuakmanum video irunna nujai Yuusa chichamen paant jintinkratainiak enentainiam ejetkartin ainiawai. Juu uwitinkia “Tuke warastarum” tana nui ii yachi jintinkratainiamu 43 video irunui, nuya chikich videosha 71 irunui. Itiura timianush najankaitiaj? Ainis najankatniusha urutma kuitiak ajapaitiaj?

 Nuna najankatniun ashi nunkanam ii yachi ii umai 900 yaimkiarmai. Video esarman “Nehemías: Jehová ikiakatmakrin warasar pujaji” tana nuna najanattsar jimiara uwi 70 mil horas pujursarmai, nuya chikich videoncha najanainiak 30 mil horas ejenkiasarmai.

 Nuna najanawarat tusar nukap kuit ajapamji. Jutikia najanatarum tusar jintintiawarmaji, tura tuin takakmasarat, warijain takatan najanawarat nusha chichamprukmaji. Ni utsumamurisha susarmaji.

 Ii yachi Jared Gossman naartin Servicios de Audio y Video tana nui yaimniuiti. Junis aujmateawai: “Testigos de Jehová takatrin chichampruinia nui itiura jintinkratatniuit nuna irunturar, ii yachi ii umai chikich nunkanmash itiur puju ainia nu nekanawarat tusar wakerin ainiawai. Ainis ati tusar chikich nunkanmaya ainia ii yachi ii umai iruntrar videon najanattsar takakmasarmai. Iisha nuu takat chichamprakur nukap kuit ajapamji”.

 Video jiiktiasar warinksha nukap utsumtainti. Video “Nehemías: Jehová ikiakatmakrin warasar pujaji” tana nuna najanainiak kuitian ti ajapawaij tusar jutikiawarmai: Patterson (Nueva York) ayamach Mount Ebo tana nui video najantai jeanam nukap nakumkar najankarmai. a Yaunchuk Jerusalennum muro amia aniun nakumkattsar yakini 6 metros nekapmainiak numijiai najanawar kaya wampuchia aniun anujrar ikiukiarmai. Nui nakumsar iniakmamsar amikiarmatai, numijiai najankamun ekekar ayantamtikrarkesh ikiu amajiarmai. Video esaram najankur 100 mil dólares ajapamji, tumaitkiusha numijiai ekekar ikiukminian najanacharuitkiuinkia nuu nukap kuit ajapawaaji.

 Video itiur najankaitiaj nu nekaarum shiir enentaimtsurmeash. Ashi nunkanam untsuri aents nuu videon iiyainiak Jehovancha shiir enentaimtusartatui. Internetnum donate.pr418.com tana nui kuit susamniaitrume. Nuu kuitjiai ashi nunkanam utsumna nui yaimiaji. Tsanka asarum kuit suarmena nui ti yuminsajrume taji.