Juu uwitinkia Testigos de Jehová menaintiu tsawan untsuri tuaktinkia atsuttawai. Antsuka julio nuya agosto nantutinkia tuinsha pujakrisha nuu tsawantinin internetnumaani iruntrar video iikir wetatji. Nuu videon ti nukape chichamjai yapajiainiak chikichik uwi iniankasarminiaiti. Antsu juu uwitinkia coronavirus sunkur aa asamtai, 2020 uwitin “Tuke warastarum” tana nunanu najanawartasar 4 nantu ejetsuk warik amikiartiniuyi.

 Nuna najanawarat tusar Betel, Nueva York nui ii yachi takakmainia 1000 micrófonos sumaktinian chichamprukarmai. Nuyasha chikich chikich nunkanam ii yachi ii umai chichaman yapajiainiak takakmainiana nuna micrófono akuptukarat tusar chichamprukarmai.

 Nuu micrófono aya chikichkichik sumaktinkia $200 iniankas aminiaiti. Antsu yupichuch jintiurmakartai tusar, nuu chichamtaik mash sumakar irumprar, nuya chikichik chikichik akupkarmai. Ainis turawaru asarmatai, chikichik micrófono akupkamuka aya $170 jiinkimiai.

 Abril nuya mayo nantutin nuna chichamprukarmai. Tura nuisha itiurchat amai, coronavirus pampaamunam nukap aents takakmainiachu asarmatai. Tumaitkiuisha, mayo amuuamurinkia ii yachi grabajastinian utsumiarmania nuna sunasarmai.

 Ii yachi Jay Swinney ashi nunkanam warinsha sumaktinian chichampruinia uuntrinti. Chichaak: “Betelnum takakmainia shiir yainniaikiarmai, tura aents suruinia nujaisha paant aujnaisarmai. Jehová ni kakarmarijiai yainkratea asamtai penker iruntrar takakmasmarmai, tura warikmasar utsumna nuna yupichuch sumakarmai” tawai.

 Ii yachi Nicholas Ahladis chichaman yapajiatniun chichampruiniamunam yaimniuiti. Chichaak: “Ii yachi ii umai chichaman yapajin ainiaka sunkurmakaij tusar jeania jiinkichmin armai. Tuma asar grabajastinian utsumiarmania nuna achikiar ti warasarmai. Ni aijiai tsaninkiar takakmaschamniaitiat, paant aujnainiak ni takatrin amikiarmai. Ainis asamtai, 500 chichamjai iniankasar Yuusa chichame jintinkratma, nakumsar iniakmamasha, nampetsha najannakarmai” tawai.

 2020 uwitin “Tuke warastarum” tana nunanu video ashi nunkanam iisarat tusar najanatniuka ti takataiti. Atum tsanka enentaijiai kuit susaitrumna nujai takat amukuitji. Yaksha ni wakerakka internetnum donate.pr418.com tana nui enkemaa kuitian susamniaiti.