KUIT SUSARMAJAISH WARI ITIURNIUITIAJ?
Internet atsamunmasha sateliteinmaani Jehovanu videon iiniawai
1 DE ABRIL DE 2021
Tuke nantutin internetnum JW Broadcasting tana nui video jiin wearmania nu ikiakatmainiaji. Tumaitkiuisha ii yachi ii umai nukap Afranicanam pujuiniaka internetnum enkemachmin ainiawai. Urukamtai aintsait?
Africanmanka internet atsu wemai. Nuyanchuka internetka majat aa wemai, tura ti kuitiaiti. Madagascar nunkanmanka ii yachi wekas iikratin anaikiamuka JW Broadcasting videon jusattsa cibernum we $16 akikmakmai. Nuu nunkanmanka nukap aents chikichik atsakamutin takakmainiaksha timianu kuitian waitmachu ainiawai.
Tuma akuisha, Africanam nukap aents JW Broadcasting videon iin ainiawai. Turasha internet atsakuisha itiurak aintsash aminiait?
2017 uwitin nukape aents Africanam pujuinia JW Broadcasting sateliteinmaani iisarat tusar najanamji. Nuka 16 chichamjai kuitchajai iismin tsawaiksha kashisha tuke awiti.
2018 uwitin Mozambique nunkanam ii yachi ni iruntairin sateliteinmaani iitiai antenan penker apujainiak junisar pujuarmai.
Sateliteinmaani iniankajnia nunaka Africanam 35 nunkanam iiniawai. Ainis ati tusar, empresa sateliteinmaani videon iniankakiarat tusar tuke nantutin $12.000 akikmaji. Nuyasha testigos de Jehová chikichik tsawantak untsuri irunainiamuri iistin akuinkia nuu nukap patatsarik akikma wemaji. Ainis asamtai, uunt tuakma video najanamun Africanam pujuinia nusha iisarminiaiti tura ii yachi Betelnum pujuinian iistasa ta jintinkrat wearmania nunasha iisarminiaiti.
2018 uwitin Malaui nunkanam ii yachi jeamin JW videon sateliteinmaani iiyainiak junisar pujuarmai.
Untsuri aents testigos de Jehová ainiatsna nusha tura ii yachi ii umai ainiana nusha ii videorin sateliteinmaani iiniawai. Tura chikichkia kuitrincha asar sateliteinmaani iitiain takakainiatsui. Tuma asarmatai nuu nunkanam testigos de Jehová iruntairin sateliteinmaani iitiain taku wearmai. Nu apujtustinkia $70 aintiakuiti, tura televisor proyectorkesh atsakuinkia $530 timianu aminiaiti. Nuka testigos de Jehová iruntairin apujnasmatai JW Broadcasting iistasar irunin ainiawai.
Ii videorin sateliteinmaani iiniak shiir enentaimin ainiawai. Camerún nunkanam ii yachi uunt anaikiamuka junis tawai: “Warinkish atsamunam maná yuu armia aintsarik ii pujajnia juisha sateliteinmaani video iiniaitji”. Nigerianmasha ii yachi Odebode naartin tawai: “Winia jearui tuke atsakamutin menaintiu iruntrar sateliteinmaani video iiniaitji. Nunaka winia uchir ti wakerin ainiawai. Chikich iiyakur pujakrisha, antsu JW apujsata tu wearmai”. Nuu nunkanmasha ii umai Rose tawai: “Yaunchuka aya noticianak iij pujuyajai. Nui meset chichaman etserainiakui suir nekap wemiajai. Tura yamaikia aya nunak iitsuk JW sateliteinmaani ii wemajai. Nui iniankainiana nuka imia shiir iijataiti. Nekaska Jehová nuna amaji tajai”.
Malaui nunkanam ii videori uchiniu najanamun sateliteinmaani iiyainiak pujuiniawai.
Mozambique nunkanam ii yachi wekas iikratin anaikiamuka tawai, juinkia ii iruntairi ainiana nui sateliteinmaani iitiain apujtusaruiti. Ii yachinkia ii umainkia JW Broadcasting iistasar iruntramu juarkitin 1 hora taasmanum ta wearmai.
2018 uwitin Etiopía nunkanam JW Broadcasting sateliteinmaani iiyasuar amikiar junisar pujuarmai.
2019 uwitin Sudafricanam Johannesburgo nui uunt tuakmanum yaja nunkanmaya ipiamu pachinkiarmayi. Nui ii yachi testigos de Jehová takatrin irunturar chichamprin ainia nuniasha ta jintinkratkamai, tura ii yachi chikitcha jintinkratawarmai. Nunaka aents sateliteinmaanisha iisarmayi. Ii yachi Sphumelele naartinkia Sudafricanam Betelnum Broadcasting tana nui takakma asa junis aujmateawai: “Yaunchuka video internetnumaani iniankaktasar internet ti penker apujsar akikmakaaji. Ainis asamtai sateliteinmaani video akupkamajnia nuka imia penker amai, tura tiikia akikmakchamji”.
Atumka internetnum donate.pr418.com nui kuit suakrumin ii yachi ii umaisha Africanam pujuinia JW Broadcasting videon sateliteinmaani iiniawai. Ti tsanka asakrumin yuminsajrume taji.