Ashi nunkanam uunt naamkaruka chikich aentsjai wainniaikiairap tura iruntrairap sunkurmakairum tama Testigos de Jehovatikia umireaji. Turayatrik, ii yachijiai ii umaijiaish iruntratniuka iniaisachuitji. Itiurkaria nush turaj? Yamaikia internetnum Zoom tana nui enkemar iruneaji.

 Zoom akikrinkia $20 iniankas aminiaiti. Ii yachi ii umai irunainia nunia kuitjiainkia timianu akikmaktinian tujintiainiak nankamas chikich aplicacionjai internetnumaani iruniarmai. Nuinkia untsuri iruntrachmin tura nekashtai aents enkemawar itiurchat amajkamnia asamtai majatauyi. Ainis ain tusar ii yachi Testigos de Jehová takatrin irunturar chichamprin ainia iruntrar, yaksha ni enentaijiain kuit susarma nujai Zoom enkematniuri akikmaktatji tiarmai. Antsu nujainkia internetnumaani iruntratin penkeraiti. Aya ipiamu ainiana nuke enkemawarminiaiti, tura untsurisha iruntrarminiaiti. Ainis asamtai, ashi nunkanam ii yachi ii umai Zoomjai internetnumaani irunainiawai.

 Indonesia nunkanam Kairagi nunia ii yachi ii umai Zoomjai internetnumaani iruntan juarkiarmai. Ii yachi Hadi Santoso tawai: “Celular, computadornaksha umuchkiatniun imian nekachiatan Zoom tana nui enkemawar yupichuch irunainiawai. Yaunchuka internetnumaani iruntainiam enkemawariat jiinkiar ataksha enkemaa ajaa wearmiayi”.

 Ii yachi Léster Jijón naartinkia Guayaquilnum Guayacanes Oeste nui uunt anaikiamuiti. Junis aujmateawai: “Juinkia ii yachi ii umai kuitrincha asarmatai, Zoomjai untsuri iruntratin akikri akikmakchamniuyi. Antsu yamaikia Zoom enkematniurin akikmatramainia asakrin untsuri aents iruntramunam ipiawarminiaitji”.

 Zambia nunkanam Norte Ngwerere nunia ii yachi Johnson Mwanza junis tawai: “Zoom enkematniurin akikmatramainiaj nui irunkur, ii yachijiai ii umaijaish wainniaikiar pujajnia ainis nekapeaji, tura Jehová anenkratuk penker waitmajnia nusha nekaji”.

 Tunia kuitjiainia nush turaj? Jehová takatri najanaki weti tusar yaksha ni enentaijiain kuitian suinia nunia kuit akankar ikiutainti, urutainsha itiurchat atai tusar. Internetnum donate.pr418.com tana nuisha kuit susamniaiti. Nuu kuitjiai ashi nunkanam utsumna nui yaimiaji. Tsanka enentaijiai suarmena nui ti yuminsajrume taji (2 Kurintiunam 8:14).