2020 uwitinkia tui tuinsha nukap itiurchat iruniarmai. Tsuer nunkanam nase uu ajamunam, Africanam yumi ti yutamunmasha, Venezuelanam yurumak atsamunmasha, nuya Zimbabue nunkanam yumi atsamunmasha nukap aents waitsarmayi. Tura COVID-19 sunkursha ashi nunkanam jeamayi. Tuma amunam testigos de Jehová ainia nusha urukawaruit?

 Ii yachi Testigos de Jehová takatrin irunturar chichampruiniak tuinsha itiurchat atai tusar iiniash iruneawai. Niinkia, septiembre 2019 juarkiar agosto 2020 timianai, itiurchat amanum yaimkiattsar $28.000.000 umuchkiarmai. Nuu kuitjiainkia yurumkan, entsancha, jeancha, jabonnasha nuya chikitcha aintiakun utsumainian susarmai, tura tsuamartinniumsha nuya jea meseraru iwiarkatniunmasha yaimkiarmai. Yamaikia, itiurchat amanum itiur yainkratkaitiaj nuu nukap etserkattaji.

 COVID-19. Ashi nunkanam coronavirus sunkur pampaakui ii yachi ii umaisha ti itiurchatan wainkiaruiti. Tuma asamtai, ashi nunkanam ii yachi anairamu nuu chichaman irunturar chichamprutan juarkiarmai. Niinkia warinkish utsumainian nekaawar etserainiakui Testigos de Jehová takatrin chichamprin itiurchatan irunturaruka itiur yaimkiatniuit nuna ii wearmiayi.

 Ainis takakmakur, utsumainia nukap yainkiarmaji. Tura uunt naamkaru warinkish sukartuiniawai tusar ii yachi anairamu itiurchat ana nui pujuinia nusha ujakarmaji. Turam, ni yachin ni umain nuna achirmakarat tusar yainkiarmayi.

 Testigos de Jehová ainiatsna nusha ii takatrin penker iisaruiti. Zambia nunkanam Nakonde tana nui policía uuntri Field Simwinga naartin junis timiai: “Iikia atumjiai tumashmakua nunisaitji. Utsumainia nu warik yainkiuitrume”.

 Angola nunkanmanka COVID-19 sunkur aa asamtai yurumak wainkiatin itiurchatauyi, tura yurumka akikri ti wakaamayi. Nu tumamunam ii yachisha ii umaisha itiurchat pujuarmayi.

 Tuma asamtai, Brasilnum Betel uuntrinkia atum ii yachi Angolanam yurumak akuptuktarum tiarmaji. Kuitian wasurkaij tusar itiura yurumak sumakar akupratniuit nuna amamkesar iisarmai. Yurumak nukap sumakma asa yupichich jintiukarmayi. Chikichik caja akupkamuka arroz, aceite, miik, tura chikich yurumkasha 44 libras chumpiamu akikrinkia aya $22 jiinkimiai. Ainis najanawar 33.544 cajas (721 toneladas americanas) akuprarmayi, tura Angolanmasha nunianak yurumkan sumaktinian Betel uuntri chichamprukarmayi. Aitkiar najanar 50.000 aents ayurkamawarmaji.

 Ii yachi ii umaisha yainkiaram itiur enentaimiainia? Angolanam ii yachi Alexandre jeachat pujawai. Nii junis tawai: “Ainis yainkiarmatai Jehová anentiniaiti tajai. Winia yatsur Yuusnumia ainia nusha anentin ainiawai. Aya wiichik pujatsjai”. Ii umai Mariza ni uchirin tsakatma asa junis tawai: “Waitiakun Yuusan seamtai anturtukmai. Tura asamtai Jehovan tura ii umaincha ti yuminkiainiajai”.

 Zimbabue nunkanam yumi atsakui ti untsuri aents tsukarin janinsarmayi. Nui ii yachi ii umaisha yurumkan utsumiarmayi.

 Tuma asamtai, ankan ankan ii yachi anairamu nuu chichaman irunturar chichamprutan juarkiarmayi. 2019 uwitin juarkiar 2020 uwitincha utsumainian yainkiartasar $691.561 umuchkiarmayi. Ii yachi ii umai nukap yaimkiarmayi. Chikichkia yurumkan chumpiniashaa, akupenasha, carrojai juiniasha armai. a Aitkiawar 22.700 aentsun ayurkamawarmayi.

 Nuu itiurchatnum pujuinia ii yachi ii umai ni yurumkari amutukaru asamtai yaintasar tarim Jehovan yuminsarmayi, tura chikitcha Jehovanu nampetan nampesarmayi.

 Yurumak atsakui junis yainmakartatji tusar aents kaunkarmania nui ii umai mai waje antuutsar wearmai. Tumaitkiuisha, nui aents politica chichaman nukap aujmattan juarkiarmatai ii umainkia sukartuinia nuka achikchamniaitji tiarmai. Nuya jiinki wenai aents wishikiainiak, “Atakka tsukamakrum yurumak seakratairap” tiarmayi. Turasha jimiara atsakamu nankaamasmanum nuu aents yurumkan tuke sukartuiniatsain ii yachinkia yurumkan ikiurkiarmayi.

 Zimbabue nunkanam yaimkiamajnia nui Jehová naari penker juakuiti. Ii umai Prisca naartin irutkamunam pujuwiti. Yumi atsamunam itiurchat irunkuisha tura nunka pukuitin tsawan jeamtaisha tuke miércoles nuya viernes Yuusa chichamen etserniuyi. Turakui irutkamunmaya aents kajerainiak, “Etseru ajakmin amijiai pujuinia tsukarin jakartaja” tiniu armayi. Tuiniakui ii umainkia ayak, “Jehovaka niiniu ainian penke ikiuchuiti” tu wemiayi. Nuna arusan testigos de Jehová yaintasar tariarmayi. Antsu nuinkia tijiuch pujuinia chicharainiak, “Nekaska Yuus ikiurmakchaiti. Iisha niiniu nekaattsar wakeraji” tiarmayi. Tura yamaikia 7 aents radionmaani testigos de Jehová irunainiamurin antuiniawai.

 Amuukatin tsawan jeakui, itiurchatka nurant iruntiatui (Matéu 24:3 [TNM]; Matéu 24:7). Atum internetnum donate.pr418.com nui kuit suakrumin yuminsajrume taji, ti tsankaitrume. Nuu kuitjiai utsumainia nu yainkir wetatji.