Ii yachi ii umai Yuusnan ni chichamejai yapajiainia mashikia Betelnum takakma ainiatsui. Chikich irutkamunam uchich oficinam takakmainiashaa nukap irunui. Ainis takakmainia nusha urukamtai penkerait? Chichaman yapajiainia nusha warijiaimpia takakmau ainia? Tura tui pujusara nuu takatnash nekas penker najanawarminiait?

 Aents nuu chichaman chichainia nukap matsatainia tijiuch amanum ii yachi ii umai pujusar chichaman yapajiainiak ni takatrin penker najanawarminiaiti. Chihuahua Mexiconam ii umai Karin naartin bajo alemán chichamjai yapajniuiti. Niinkia junis tawai: “Yamaikia matsatkamu Cuauhtémoc jui Jehovanu bajo alemán chichamjai yapajiainia nujai takakmaji. Juinkia ti penkeraiti. Ii aijiai chicham yapajiakur tura etserkur wekaajnia nuisha tura sumarmaktasar weajnia nuisha aya bajo alemán chichamjain chichaatainti. Tumakur yaunchunia chichaatai antu wemaji, tura yamaiya jui aents itiur chichau ainia nusha antiniaitji”.

 Ii yachi James, Ghana nunkanam Frafra chichamjai yapajiainia nui yaimniuiti. Ni ai Betelnumia ainian aneajai tawai, turasha junasha tawai: “Frafra chichamjai yapajiajnia juinkia shiiraiti. Tura aents ni chichamejain Jehovanu ujainiam shiir antuiniana nusha ti waramtikrawai”.

 Chicham yapajtiai yamaram najanattsar chichampruiniakur wari iiniaitiaj? Estados Unidos, Warwicknium ii yachi Joseph ashi nunkanam jeamkatniun chichampruiniana nui takakmawiti. Niinkia tawai: “Chicham yapajtiai najanattsar wakerajnia nuinkia, luz tura entsasha tuke atiniaiti, tura internetsha atiniaiti, wari nujai takatan yapajiawarat tusar akuptainti. Tuma asamtai, aents nuu chichaman chichainia nui nekassha tuimpia imia penker aminiait tusar amamkesar iiniaitji”.

 Kuit nukap ajapruawaij tusar tura warikchik ati tusar, testigos de Jehová iruntairin nuinchuka misionero jeenkesha chichaman yapajiarti tu wemaji. Nui takakmauwar amikiar ni jeen waketin ainiawai. Antsu ainis turachminiaitkiuinkia, departamento oficinan takaku sumakar nuin pujusar takakmasarti timiniaitji. Ukunmatai chikich utsumnakuinkia jea surukar nuu kuitjiai tuinsha chikich najanamniaitji.

 2019 uwitin juarkir 2020 uwitincha tuinsha iruntrar chikich chikich chichamjai Yuusnan yapajiarat tusar $13.000.000 ajapruamji. Nujainkia luz, entsa, internetsha akikmatkarmaji, tura computadorajai grabajasarat tusar sumakar susarmaji. Chikichik computadoranam $750 ajapruamniaitji. Computadoranam aplicaciones sumakar apujtutainti, tura chikich aplicación ii najanamu Watchtower Translation System tana nusha apujtutainti. Nujai chichaman yapajiainiak ni takatri mash iruamun wainkiarminiaiti, tura computadoranam chikich papiincha apatkar iisarminiaiti.

 Chichaman yapajiainia niinki pujusarkesh grabajasarat tusar su ainiaji. Nuna susamu asar COVID-19 sunkur tamataisha ni jeen juakar papiincha videoncha yapajki wearminiuyi.

 Ii yachi ii umai tijiuch pujuinia yaimniush irunui. Niinkia chicham yapajiamun paant nekaamniakait tusar ii wenawai, tura chikichkia chicham yapajtiai jean iwiarin ainiawai. Ii yachi Cirstin naartin Sudafricanam Ciudad del Cabo nui afrikáans chichamjai yapajniuiti. Niinkia junis tawai: “Juinkia nukap ii yachi ii umai warinkish najanatniun nekainia asar yaimiainiawai. Precursores yaimiainiash irunui”.

 Ainis yaimiainiak shiir nekapin ainiawai. Ii umai chichaak: “Jui yaimiakun tuke takakmaki weminia ainis nekapniuitjiai”. Chikichkia ii yachi ii umai tijiuch pujuinia grabajainiash irunui. Nuna aujmateak ii umai Juana naartin Mexiconam Veracruz nui totonaco chichamjai yapajin asa junis tawai: “Yamai pujajnia juinkia tijiuch amanum ii chichamen chichainia nukap matsatainiawai. Ainis asamtai ii umai ii kai tijiuch pujuinia grabajasarat tusar seau ainiaji”.

 Ii yachi ii umai tui tuinsha iruntrar Yuusnan ni chichamejain yapajiawaruana nusha penkerak najanamuit? Papiin aitkiawar najanamun nukape aents aujainiak, yamaikia ti paant nekaamniaiti tiniu ainiawai. Ii yachi Cédric naartin República Democrática del Congo nui Congo chichamjai yapajniuiti. Niinkia junis aujmateawai: “Yaunchuka ii yachi ii umai testigos de Jehová papiiri Congo chichamjai najanamun aujainiak, ii chichamenka ainis tuchatainti, nushaa chichamaiti, ainis tu wearmiayi. Antsu yamaikia, ii chichaajnia timiatrusan ti paant najanamuiti tiniu ainiawai”.

 Sudafricanam Xhosa chichamjaisha nunisaiti. Nui takakma ii yachi Andile junis tawai: “Ii yachinkia ii umainkia yamaikia xhosa chichamjai najanamua nuka imia paantaiti tu wearmai. Yaunchuk uchikia Etserma papiin inkis chichamjai auj wearmiayi, turasha yamaikia xhosa chichamjain aujainiawai. Tura Yuusa chichame Traducción del Nuevo Mundo ataksha yapajiawar najanamuncha aujuujatan wakerin ainiawai”.

 Atum kuit suarmena nujai ashi nunkanam Yuusnan penker yapajki wearat tusar chichampruiniaji. Internetnum donate.pr418.com nui enkemar kuit susamniaiti.