KUIT SUSARMAJAISH WARI ITIURNIUITIAJ?
Nukap takakkurkia ishichik takakainia nu yain ainiaji
1 DE OCTUBRE DE 2020
Testigos de Jehovatikia untsuri nunkanam Yuusna jintinkratniuitji, tura utsumainia nusha yain ainiaji. Nui ii yachi ii umai kuitrincha asar niisha yaimkiattsar aya ishichik kuitian su wearmai. Tuma asamtai nuu nunkanmasha wari kuitjiain Jehová takatri najantain?
Yaunchuk Kristu aents kuitjiai yainiain armiayi. Nuna aujmateak 2 Kurintiunam 8:14 junis tawai: “Ashí métek takusarat tusan tajai. Iis atumsha yamaikia tí nukap takakrume, nuja̱i̱ atsuma nu súsatniuitrume. Ukunam chíkich tsawantai̱ átum atsumashtarmeash. Nuiṉkia nisha atumín suramsarti. Nu túratin ákuiṉkia ashí métek takustin átatui”. Nuna umiktasar Testigos de Jehová takatrin irunturar chichamprin ainiaka ashi nunkanam wari utsumna nuna iin ainiawai, tura yaksha yaimkiattsa wakerak kuit susarma nu wasurnakain tusar amamkesar enentaimin ainiawai. Betel irunna nui ii yachinkia kuit susarman iisarat tusar anairamush irunui. Niinkia kuit ampiniarmatainkia chikich nunkanam utsumiarminiaiti tusar akupin ainiawai.
Nuu kuitjiai chikich nunkanmasha ii yachi ii umai yainkiaram itiur enentaimiainia? Tanzania nunkanmanka nukape aents tuke tsawantin 2 dolareskesha waitma wecharmai. Nuu nunkanam Mafinga tana nui Testigos de Jehová kuit akuptukaram ni iruntairin iwiararmai. Nuya junis aarar akupkarmai: “Ii iruntairi iwiaramajnia nunia yamaikia untsuri irunainiaji. Jehová iruntramurinkia tsanka asar ni kuitrijiai yainkratainiakui ii iruntairi ti shiir iwiaramunam iruntrar Jehová enentaimtaji”.
COVID-19 sunkur pampaa asamtai ii yachi ii umai Sri Lanka nunkanam utsumawaruiti. Nui ii umai Imara Fernando ni uchichiri Enoshjai utsumainian yajania kuitjiai yainkiarmai. Nuya junis aarar akupkarmai: “Itiurchat pujajnia jui Jehová aentsri ti anenkratin asar yainmakarmaji. Iisha Jehová aentsri ajasu asar ti waraaji, tura tsawan amuamunam pujuiniajnia jui Jehová niiniu ainian tuke yainkiarti tusar seawitji”.
Imara Fernando ni uchiri Enoshjai pujawai.
Ii yachi ii umai tui tuinsha pujuiniak ni jeamunak yaimkiattsar wakerin ainiawai. Nuik aujmattsamu uchi Enosh naartinkia utsumainian yaintinian kuit ikiutain najanamai. Ii umai Guadalupe Álvarez naartin Mexiconam pujana nuinkia ti nukap aents kuitrincha ainiawai. Tumaitkiuisha ii umainkia yaimkiattsa wakera asa ni jeamunak kuitian suwiti. Nii chichaak: “Jehová winia anentak nukap yainkiaiti. Tuma asamtai kuitian suajai. Chikitcha nunisaran suiniawai. Nuu kuitjiai ii umai ii kai itiurchat pujuinia nu yayainiam ni utsumamurin waitmakartatui” tawai.
Betelnum ii yachi kuit susarman iistinian anairamuka chikich nunkanam kuitian akupenak shiir nekapin ainiawai. Ii yachi Anthony Carvalho, Comité de Sucursal de Brasil nui pachitkiaiti. Nii chichaak: “Yaunchuka Brasilnum kuit imian atsakui chikich nunkanmaya Betel kuitjiai yainmainiakrin Jehová takatri najanmiaji. Nujai Brasilnum Testigos de Jehovati nukap kawenkuitji. Antsu yamaikia kuit aa asamtai iisha kuitjiai yaimkiatin jeaji. Juinkia ii yachi ii umai yaja nunkanam etserainia nuna enentaimtuiniak kuitjiai yaintasar wakerin ainiawai. Nuna turuiniak Jesukristu jintinkratamia nuna umirainiawai” tawai.
Ii yachi ii umai utsumainia nu yaintasrum wakerakrumka, chikich nunkanam Betel ana nui kuit nakak akuptsuk, iruntainiam “Obra mundial” tana nui kuit enkeamniaitrume. Nuinchuka internetnum donate.pr418.com tana nuisha enkemarum kuit susamniaitrume. Tsanka asarum kuit suarmena nui ti yuminsajrume taji.