Testigos de Jehovajai Yuús Papií unuímiatkum iinkiaa warí unuimiártatam nu unuimiatram nákaschashitiam. Aíntsamek irúntramunam unuimiátratniusha iínkiaa unuimiátratniuitme. Nu túrattsamka tsawánt aántuatniuitme. Túrakmeka Yuusna nuú nukap nekaáttame.

Tui unuimiártatam tura urutaí unuimiártatam nu tsawánt aántuata. Jútikiam unuimiárminiaitme. Kashik nantakím takákmastasam wetsuk unuimiárminiaitme. Túrutskesha uchi kanárarmatai unuimiárminiaitme. Ankánt achíakchakmesha tsawánt aántuata, tura warinkish nankaámakuisha unuimiartin penké iniaisaip. Warinsha itít amajtámsacharminiana nui weme unuimiarta. Tura radio, televisión, nuyá celular ikiajniákarta, itít amajtámiarain. Yuusna unuimiártasam iínkiaa Yuús seatá, itiúrchatrum itít amajtamin. Nu túrakmeka esetram enentáimsattame (Jiripiusnum [Filipenses] 4:6, 7).

Warí enentainia áujmatea nu nekaám, shait amajkitia. Iwiárnaru asám chicháktincha yúpichuch arutrámtiatui. Irúntramunam unuimiartin jútikiam unuimiátrata. 1) Akankámuri nekaám, akantrámurisha nuú enentainkiash aujmatea tusam iistá. 2) Tura nakumkamu írunna nu iistá nuyá ataksha awákeki nekaatin anintrustin ana nusha áujsata. 3) Nuyá chikíchkimsam párrafo aujsam, tuimpiá aníntramu aíktintri aa nu nekaata. 4) Yuusa chichame aarma íruneana nu áujsata, turam unuímiamna nuú enentaíyashit tusam nekaata (Túramu [Hechos] 17:11). 5) Aníntramu aíktintri wainkiamka, tua pénker iisum nuke shait amajkitia. Unuimiatra asám yúpichuch iiyakum irúntramunam chicháktasam wakérakmeka ame enentaimjiaink ewejém takuím áujmattsamniaitme.

Irúntramunam unuimiáttaiyana nu unuímiatkumka Yuusa chichame nuú nukap nekaáttame (Mateu 13:51, 52).

• Irúntramunam unuimiátratin urutainia unuimiátramniaitiam?

• Amesha irúntramunam unuimiátmanum áujmattiaj takumka warí itiurkamea unuimiátratniuitiam?