Ti uurak, ti nasentak, mash eméskamtai nuyánchuka chikich warinkish nankaámasmatai, Testigos de Jehovátikia ii yachí, ii umaí, wárikmasar yayaíniaitji. Urúkamtai nusha túriniaitiaj? Waitnentaíniakur yayaíniaitji. Nu túrakrin chikich aentscha, átumka nekás Kristu aéntsuitrume turamin áiniaji (Juaṉ 13:34, 35; 1 Juaṉ 3:17, 18). Túrasha itiurkaria yayaíniaitiaj?

Kuítkisha súwitji. Yaunchuk “Masetúnianmaya̱ shuarsha tura Akayanmaya̱ shuarsha kuítian irurar Jerusaréṉnumia̱ Yus-shuaran atsumainia nuna akuptuktai” tiármiayi (Rúmanam 15:26). Yamaisha áintsarik, ii yachín, ii umaín, warinsha nankaámatsarai tuíniakuinkia, ii irúntairin kuit enkeamu ana nuna, uunt tsamakú anáiramuka nuú kuitian tui utsumainia nui akuptin áiniawai (2 Kurintiunam 8:13-15).

Warinia utsumainia nu súwitji. Warinsha nankaámasmatainkia uunt tsamakú anáiramuka ni yachí, ni umaí, iwiákainiawash tusar chikíchkimsar eakártiniaiti. Nuyá yaímkiarat tusar anáiramuka itiúrkara yurumkan, entsancha, pushincha súsartiniait nuna iwiárartiniaiti. Tura doctórnasha akuptúkartiniaiti, nuyá jeéntichu juákaru tuink pujusártiniait nunasha eárkartiniaiti. Testigos de Jehová ni wakéruiniaka ni yachí jeen meserún jeámprittsar werín áiniawai. Tura chíkichkia Salones del Reino meserun jeamtiai tusarsha werín áiniawai. Testigos de Jehovátikia pénker iruntrar takakma asár, utsumaíniana nu wárikmasrik yayaíniaitji. Tura aintsank, Yuusa chichame tawai: ‘Tuma asamtai yáiṉmin ákuiṉkia ii jeajnia nu túratniuitji nekaska ii yachi̱ yáiṉkiartin, Yus-shuar ainia nu. Tura ashí shuarsha yáiṉtiniaiti’ (Karaseanam [Gálatas] 6:10). Ainis asamtai, chikich aents Testigos de Jehová áiniachkuisha, páchitsuk yainkiártiniaitji.

Ti waítsarain tusar Yuusa chichámejai atsánkrartiniaitji. Aents itiurchat pujuiniak wáitiainiakui ikiakarar atsánkrartiniaitji. Yuús Papií túramji: “Ii wáitiajnia nui Yuska in atsaṉtamji. Tura in atsaṉtamjinia nútiksarik iisha chíkich shuar wáitiainia nuna atsaṉkrarat tusa túrutmaji” (2 Kurintiunam 1:3, 4). Jesuska Yuusa anáikiamuri asa, juú nunkanam aents waítsarain tusa ashí yajaúch nankaámana nuna amú amú amajsáttawai (Apukarípsis 21:4). Nuú chicham aents ujaíniakur atsánkainiaji.

• Warinkish nankaámasmatai, Testigos de Jehovati itiurkaria wárikmasar yaímniuitiaj?

• Itiúr atsánkartiniaitiaj?