Yuús Papiinium junis aármauyayi: Jesús jakamtai, “nemartusarat tusar wakeruiniak atumi̱i̱nia̱ṉ wait chichaman unuikiartin jintrartatui” tímiayi (Túramu [Hechos] 20:29, 30). Tímiania tímiatrusank, aents Jesusan umíreaji tuíniayat, Yuús Papiínmayanchun pachimprar wait chichaman etsériarmiayi (2 Timiutéun 4:3, 4). Yamaisha áintsankete. Ántsuka Testigos de Jehovátikia Yuús Papiínmania nekasa nu pachimtsuk etsérniuitji.

Yuús Papiínmania nekasa nuna Jehová paant nekámtikiawarmiayi. 1870 uwitinkia, aents ishichik iruntrar, Yuús Papiín ámamkesar unuimiatuú pujusár, iglésiaska Yuusa chichamen nekasa nuna aentsun unuíniainiachun nekaáwarmiayi. Nunis akui, nuú nukap tishipsar unuimiátrarmiayi. Nuna túruiniakui, Jehová ni chichamen paant nekaáwarat tusa yainkiármiayi. Urúkamtai nuna túramia? Yuús Papií tana aintsank, amuúkatin tsawánt nuntúmsamunmanka “nekásana nu ti paant nekánatniuiti” (Daniel 12:4).

Aents pénker enentaín takákainiaka Yuús Papiín pénker unuimiátrarmiayi. Testigos de Jehová yaúnchuka Estudiantes de la Biblia tu nekaamu ármiayi. Yuús Papiín unuimiátainiak, paant nekaatai tusar chikichkí enentainniak unuimiatin ármiayi. Nuyá nekaáchminian waínkiarka, chikich capítulonam warintiuak tusar apatkar iisár, paant nekaawar, papiinium anúj wéarmiayi. Nuna túruiniak, Yuusa naarin, jakarsha uruktain, jákaru nantakiártinniasha, nuyá Yuusa anáikiamuri akupín ajás juú nunkanam itiurkatta nunasha paant nekaáwarmiayi. Nuna nekaawar, iglesiaska wait chichaman jintintrámaitiashi, tu enentaimsar yajaúch túrutairinkia iniaísarmiayi. Yamaisha áintsarik, Testigos de Jehovátisha Yuusa chichame nekásana nu paant nekaami tusar unuimiátniuitji (Juaṉ 8:31, 32).

1879 uwitinkia, Estudiantes de la Biblia ármiania nuka ashí nunka tépakmanum Yuusa chichame nekásana nu etsérkartai tiármiayi. Nuú uwitin La Atalaya. Anunciando el Reino de Jehová (shuar chichamjainkia “Jehová Anáikiamuri Akúpeawai tusa Étserma”) tana nu papiín najantan juárkiarmiayi. Yamaisha chikich chichamjai ashí nunkanam nuú chichamak etserkir wéaji. Tura yaunchuk etsérchatainiam tui tuinkish yamaikia Yuusnan nekásana nu étsereaji.

• Jesús jakamtai Yuús Papiín pénkerash jintínkratiarmia?

• Itiurkaria Yuusa chichame nekasa nu paant nekaitiaj?