Jesús jákatin ishichik ajasmanum, Pedro, Santiago, Juan, nuyá Andrés, Jesusan junis aniásarmiayi: “Ame iíkrateakmin itiúr nekaataj? Tura yamaí írunna nu amuúkatin jéakuisha itiurá nekaataj?” Tutai Jesús ayaák junis tímiayi: “Aents ni uúntriniun iniaitsuk esetar enentaimias takarín, chikich niijiai takákmainia utsumaíniakui ayúrawarat tusa anáikiamusha, yakit?” (Mateo 24:3, 45, Traducción del Nuevo Mundo [NM]; Márkus 13:3, 4). Nuna tákunka, winia takártinian apatkun ayúrawartinia núnisank, winia aentsrun Yuusa chichame nekásana nuna jintintiuú pujuártinian anáirattajai tusa tímiayi. Jesús ni chichakmárincha umikiúashit? Iisha nu nekaátniuitji.

Ishichik Testigos de Jehová Jesusnan “iniaitsuk esetar enentaimias takarín” arat tusa Yuusa kakármarijiai anáiramuiti. Jesús ‘takarniun’ áujmatsamiania nuka chikichkí aentsnak áujmatsachmiayi. Ántsuka Testigos de Jehová takatrín irúnturar chichamprúkarat tusa ishichik aents anáiramun tímiayi. Niinkia pénker iruntrar takakmau asar, chikichik takaana ainis áiniawai. Yuús Papií tana aintsank, Jesusnan ‘takárniuka niijiai takákmainiana’ nunasha ayúrawartinia núnisar Yuusnan nekásana nuna jintintiáwartiniaiti. “Chikich niijiai takákmainia” tana nuka ashí Testigos de Jehovatin túramji. Tuma asamtai, Jesusnan “iniaitsuk esetar enentaimias takarín” ainia nuka Yuusnan tuke pénker jintintramin áiniaji. (Lucas 12:42, NM).

Jesuska niiniun waitrúkarat tusa anáiraiti. Jesuska ni ‘takarniurin’ ti nukap takatan súsaruiti. Jehová irúntramurin juú nunkanam írunna nuna, máshiniu iirtúsarat tusa anáiraiti (Rúkas [Lucas] 12:44). Kuitian itiúr ajápawartiniait nuna, tura Yuusa chichame itiúr pénker etsérkatniuit nunasha, chichamprúkarat tusa anáiraiti. Tura aintsank, irúntramunmasha tura untsurí tuakmánumsha waríniuna jintínkratatniuit nunasha chichamprin áiniawai. Nuyá chikich aentscha Yuusna jintintiatniun papiín sukartin áiniawai.

‘Jesusnan takárniuka’ Yuús Papií tana tímiatrusarank jintínkratin ásarmatai tura Yuusa chichamen etserin ásarmatai, iniaitsuk umín áiniawai taji (Túramu [Hechos] 10:42). Tura núnisank, Jesusa takatrí juú nunkanam írunna nuna ámamkesar chichámpruinia ásarmatai, esetrar enentaimsar takakmau áiniawai taji. Nuna túruinia ásarmatai, Testigos de Jehovati ashí nunkanam nukap kawenki wéaji. Nuyasha, Yuusna unuimiátratniun papiín nukap najanki wénawai. Nu mash paant wainiu asár Jehová nekás yayaíniawai taji (Túramu [Hechos] 16:5; Apukarípsis 7:16, 17).

• Jesús ni ‘takarniurin’ warí takatna najánawarat tusa anáiramia?

• ‘Jesusnan takarniusha’ urúkamtai “iniaitsuk esetar enentaimias” takakmau áiniawai taji?