Precursor tana nuka, ukunam winiarat tusa eem jintiamki wéana nuiti. Jesussha aintsank juú nunkanam akupnákmiayi, aents uwémprartinian yaíntinian (Mateu 20:28). Jesús túrimia núnisar yamaisha Jesusan umírkarat tusar nukap unuíkiartaji (Mateu 28:20). Testigos de Jehová nii wakéruiniaka Jesús túrimia núnisar túrattsar precursor ajasáruiti.

Precursor ajasáruka Yuusa chichamen nukap etsérkattsar ankantan sumamin áiniawai. Mash Testigos de Jehovátikia Yuusa anáikiamuri juú nunkán shiiram amajsáttawai tusar etsérniuitji. Tura Yuusa chichamen nukaá nukapet etsérkattsar wakéruiniak, tuke nantutín 70 horas etsérkatjai tiniush íruneawai. Nuka apách chichamjainkia precursor regular tutainti. Nuna túramij tusar takákmainiaksha tiikia nukap takákmachu áiniawai. Chíkichkia tímianu etsérkatniun jeaíniachuka, chikichkí nantutín 30 horas nuyánchuka 50 horas etsérkatjai tiniush íruneawai. Nuka apách chichamjainkia precursor auxiliar tutainti. Tura chikichsha tuke nantutín 130 horas etsérkarat tusar anaíramush íruneawai. Nuka apách chichamjainkia precursor especial tutainti. Nuú anáiramu áiniaka Testigos de Jehová ishichik pujuíniamunam Yuusa chichamen etsérkatniun yaímkiarat tusar akupkamu áiniawai. Testigos de Jehová nuú nukap etserin ainia nuka Jehová yaintkiáttawai tusar nii achíakmajaink warasar pujú áiniawai (Mateu 6:31-33; 1 Timiutéun 6:7, 8).

Anénkratin asar yaínkratkattsar wakerin áiniawai. Jesús juú nunkanam pujumia nuú tsawantinkia, aentska Yuusnan nekasa nuna unuíniachma asar waakárua ainis waitsar pujuármiayi. Túmainian Jesús wainiak, ti waitnentrar Jehovanun nukap unuíniararmiayi (Márkus 6:34). Precursor ajasárusha núnisar túruiniawai. Yamaiya jui pénker pujuarat tusar aentsun Yuús Papiijiai jintintiaíniawai tura ukunma nuisha nekás pénker pujustin átatna nunasha unuíniainiawai. Precursor áiniana nuka aentsun anena asar Yuusnan nukap unuíniarartasar ti kakaíniawai. Jesussha tímiayi: “Ame aya̱shim aneamna tímiatrusmek” chikich aentssha aneástiniaitme (Márkus 12:31; 1 Tisarúnikianam [1 Tesalonicenses] 2:8). Precursor ajasár Yuús Jehován ti anenak wará warát enentaimin áiniawai (Túramu [Hechos] 20:35).

• Precursor ajasárusha warinia itiurin ainia?

• Precursor áiniana nusha yana anénakua nukap etsérkattsar wakerin ainia?