Yuusnan pénker unuíkiartuiniachkui nukap aents ni iglésiarin wénatsui. Túrasha, Testigos de Jehová irúntairincha urúksankit? Nu nekaattsam wakéramek?

Nuinkia aents shiir ajainia irúnniuiti. Yaúnchuksha Kristu aentssha Yuusan enentáimtustasar Yuús Papiín unuimiátrattsar tura mai íkiakanai ajattsar irunin ármiayi (Israernum [Hebreos] 10:24, 25). Nui irúnainiakka mai ánenai ajainiak shiir nekapiármiayi (2 Tisarúnikianam [2 Tesalonicenses] 1:3; 3 Juaṉ 14, 15). Tura yamaisha áintsarik iruntrar mai íkiakanai tura mai ánenai ajakur shiir nekápeaji.

Yuusa chichame ámamkesar unuimiáttainti. Yaunchuk irunin ármiania áintsarik, yamaisha Yuusa chichamen ti pénker unuimiátraru jintínkratainiakui áishmanksha, nuwasha, uchisha antuktai tusar irúntainti. Tura ii iwiaákmarin itiurkaria yapajniátniuitiaj nusha nekaátainti (Deuteronomio 31:12; Túramu [Hechos] 15:30-32). Jehová enentáimtakur nampértainti, tura jintínkratu anínkratkui chicháktasar wakérakrikia ewéj takuír chichatainti (Israernum [Hebreos] 13:15).

Yuús enentáimtamunam mai íkiakanai ajattsar irúntainti. Chikich nunkanam Kristu aents irúntraru ármiania nuna aátainiak Pablo junis tímiayi: “Kame atumsha tura wisha Yus nekas enentáimtuinia asar mai ikiakánai ajatai tusan wakerajai” (Rúmanam 1:12). Ii yachijiai, ii umaijiai, iruntrar mai íkiakanai ajakur Yuús umírkatin wakeruujat nekáptainti.

Yuús enentáimtustasar irúntramunam amék winím nekaitia. Nuinkia kuitian seátmachartatui.

• Yaúnchuksha Kristu aents urúkamtai irunin armia? Tura yamaisha urúkamtai irúnniuitiaj?

• Irúntramunam urúkamtai wétiniaitiam?