Jesús nayaímpiniam akupín ati tusa Yuús anáitiuktatui tu etsérmiania nuka apách chichamjainkia “Reino de Dios” tutainti (Lucas 8:1, Traducción del Nuevo Mundo). Yamaisha Yuusa anáikiamuri akúpeawai tana nu ii irúntairin unuimiáttainti. Tuma asamtai ii irúntairinkia apách chichamjainkia Salón del Reino tutainti.

Jehovanu unuimiátrattsar irúntainti. Ii irúntairinkia Yuusa chichame itiúr pénker etsérkatniuit nu unuimiáttainti (Mateu 24:14). Ii irúntairinkia úuntkesha tura yaírmanktakuksha jeamkamu áiniawai. Túmaitkiusha kuit tiikia ajápruamu áiniatsui. Ii irúntairinkia yamaí irúntrarmatai, chikich tsawántincha nuú jeanmank chikich Testigos de Jehová irunin áiniawai. Testigos de Jehová kawenkí wena asamtai ashí nunkanam ii irúntairi nukap jeámeaji. Nusha itiurkaria jeámniuitiaj? (Rúkas [Lucas] 18:27)

Ii yachí, ii umaí, tura yaksha, ni enentaijiaink kuitian enkén áiniawai. Nuú kuítniaka Testigos de Jehová mátsatkamurin akuptin áiniawai. Nuna akuptúkaram ni yachí, ni umaí, aránt pujuinia ni irúntairin jeamiarat tusar túrutskesha iwiárarat tusar yayaín áiniawai.

Ii irúntairin jeámkatniun pénker unuíniarma áiniawai tura kuítchajai takakma áiniawai. Ii irúntairin jeamuú wekaincha íruneawai. Nui takákmasarat tusar anáiramuka tuke takakmasha tura ishichik tsawánt yaímniusha íruneawai. Nuú anáiramuka ni yachí, ni umaí, aránt pujuíniana nuna irúntairin jeámprittsar werín áiniawai. Ii irúntairin jeamuú wekaín áiniana nu takákmainiakuisha, nui pujuíniasha yaimin áiniawai. Tura chikich nunkánmanka Testigos de Jehová irúntairin jeámkatniun tura iwiáratniun chichamprúkarat tusar anáiramush íruneawai. Nekaska Jehová yaimkiui, tura ii yachí, ii umaí, asúmprusar takákmainiakui ii irúntairi nukap jeámtainti (Sántiak 4:15; Kurusenam [Colosenses] 3:23).

• Ii irúntairi apách chichamjai Salón del Reino tájinia nuisha warí unuimiattain?

• Itiurkaria ii irúntairi nukap jeámniuitiaj?