Jesús jasattuk ajás chichaak: “Yuusa anáikiamuri akúpeana nuna shiir chichaman mashi nekaáwarat tusar ashí nunkanam etsérnaktatui” tímiayi (Mateo 24:14, Traducción del Nuevo Mundo [NM]). Nuú chicham itiurkaria umiaj? Jesús etsérkamia áintsarik yamaisha ashí nunkanam étsereaji (Rúkas [Lucas] 8:1).

Jeakár jéakar etsérniuitji. Jesús ni unuíniamuri ainian jeakár jéakar werúm etsérkatarum tusa unuíniararmiayi (Mateo 10:11-13, NM; Túramu [Hechos] 20:20). Núnisank, ashí aents ujatrúktarum tusa “Jesussha in akuptamkaitji” Yuús Papiinium tawai (Túramu [Hechos] 10:42). Jesús ni unuíniamurin tímiatainia etsérkartiniuya nuna tinia akúpkarmiayi (Mateu 10:5, 6). Yamaí tsawantaisha áintsarik, nánkamsar wekasár etsérchaitji. Ántsuka ii írutrajnia nuniá yachijiai, nuniá umaijiai, tímiatainia etsérkatniuitiaj nuink etsérniuitji. Nu túrakur Jesús tímiania nu umíaji.

Aents tui tuinksha pujuinia nui werír etsérniuitji. Jesús tuinksha aents nukap irunmia nui etsérmiayi. Nayantsa kánmatkarincha, entsa jutaínmansha etsérmiayi (Márkus 4:1; Juaṉ 4:5-15). Iisha áintsarik mercádonam, terminalnum, aents takakmak pujuíniamunam, tura teléfonojaisha Yuusna etsérniuitji. Tura aintsank takatnumsha, escuélanmash, ií shuarjaisha Yuusna áujmatniuitji. Aitkiar etsérkurin ‘ewempratin chichaman’ ashí nunkanam ántuiniawai (Apukarípsis 14:6).

Yuús uruma nui najánattana nusha yájainia áujmattsattsam wakeram? Yuusna nékayatam etsertsuk pujuíp, yájainksha áujmattsata.

• Warí ‘shiir chichama’ etsérniuitiaj?

• Testigos de Jehovátisha Jesús túramia áintsarik itiurkaria etsérniuitiaj?

• Testigos de Jehovátisha tuimpiá etsérniuitiaj?