Yuús Papiinium Apukarípsis 14:6 tawai: Yuusa chichame “ashí nuṉkanam” etsérnaktiniaiti. Tuma asamtai, chikich chichaman chichaku ainia nuú aentscha nekaáwarat tusar Testigos de Jehová nukap chichataijiai papiín najanin áiniawai. Papiín aarar takákmaka nuyá chichaman yapájniuka ashí nunkánmania áiniawai. Itiúrkara imiá núkapsha najanin ainia?

Ni papiirinkia iinkís chichamjai aarma áiniawai. Testigos de Jehová takatrín irúnturar chichámprinkia Estados Unidos Betelnum pujú áiniawai. Niinkia chikich Testigos de Jehová tsamakarun anáiraruiti, papiín aarar takákmainiana nuna iisarat tusar. Nu anáiramuka Estados Unidos Betelnum pujú áiniawai. Tura papiín aarar takákmainia nuink pujuiniash íruneawai. Nuyá chíkichkia yajá nunkanmash pujuíniawai. Áitkiawar papiín najánawaru asamtai ashí nunkánmaya aents aujuujat nekapin áiniawai.

Iinkís chichamjai aarman chikich chichamjai yapajiáwarat tusar akuptin áiniawai. Testigos de Jehová takatrín irúnturar chichámprinkia iinkís chichamjai aarman iisár pénkeraitkiui, chikich nunkánmasha ni chichámejaink yapajiáwarat, akuprátarum, tiniu áiniawai. Nu akuptúkaram, iinkís chichamjai tana tímiatrusarank Yuusa chichamen “nekasa nuna” ni chichámejaink yapajín áiniawai (Eclesiastés 12:10).

Computadórajai warik najántainti. Computadora niínkikia aákmarchamniaiti, tura chikich chichámjaisha yapajiáchminiaiti. Túmaitkiuisha, aentska computadóranam enkemawar, diccionárionmansha eakár, takatrín pénker najanin áiniawai. Testigos de Jehovaka nukap chichataijiai aartai tusar computadóranam najánamun takákainiawai. Nuka apách chichamjainkia Sistema Electrónico de Edición Plurilingüe (MEPS) tutainti. Nújainkia aármanum nakumkámuncha tímiatrusarank anujtin áiniawai. Nuna túrawar amikiár, papiín jiikiarat tusar akupín áiniawai.

Yuusa chichame junis tawai: “Ashí shuar nekas chichaman nekaawar uwemprarat tusar wakerawai Yus” (1 Timiutéun 2:3, 4). Ainis asamtai, Testigos de Jehová papiín aarar nukapé chichamjai yapajiáwartasar ti takákmainiawai.

• Testigos de Jehová ni papiirín aártasar itiurin ainia?

• Urúkamtai ni papiirín nukap chichataijiaisha yapajín ainia?