Nakumkámunam aents wará warát ajaíniana nuka Yuús enentáimtusartai tusar untsurí kaúnkaru áiniawai. Yaúnchuksha Yuús niin umirín ainian tuke uwitin menaintiú irúntrarum winia enentáimtursatarum tímiayi (Deuteronomio 16:16). Yamaisha áintsarik, Yuús enentáimtustasar untsurí irúnniuitji. Tuke uwitin menaintiú tuatainti. Nu túrakur wará warát nankaámawitji.

Chíkichjiai wainniairar mai ánenai ajattsar tuatainti. Yaunchuk Israel aents untsurí iruntrar Jehován enentáimtuiniak, shiir wará warát nekapin ármiayi. Yamaisha áintsarik tuke túriniaitji (Salmo 26:12; 111:1). Nui tuakmanum, chikich Testigos de Jehová áiniajai nekánaitiainti, tura chikich nunkánmaniasha Testigos de Jehová ainia nekaámniaitji. Yaúnchuksha untsurí Kristu aents Yuusan enentáimtustasar tuakaár ‘shiir enentáimtunaisar yurumainiak’ pénker nekapin ármiayi (Túramu [Hechos] 2:42). Yamaisha áintsarik tutupin ajásmatai apatuk yurumamij tusar itiarmamu yurúmtainti. Nu túrakur Yuusnumia yachijiai, Yuusnumia umaijiai, mai ánenai ajatainti (1 Pítiur 2:17).

Yuús wakérana tímiatrusrik umíktasar tuatainti. Israel aents untsurí tuakaár Yuusa chichame jintiám paant neka ármiayi (Nehemías 8:8, 12). Yamaisha áintsarik, untsurí tuakár Yuús Papiínmayan jintínkratainiakui ti shiir unuimiátniuitji. Yuús Papiinium aents yaunchuk túrunawarmia nuna áujmatsamun tura yamaí Kristu aentstisha warimpiá nankaámatramniuitiaj nunasha nakumsar iniákmamainiakui, Yuús wakéramu itiurkaria najánamniaitiaj nu unuimiáttainti. Nuyá Kristu aents itiúrchatan wainkiar itiúr nupétkaruit nu antukar kakaátainti. Tura, Jehová aya áminiak tuke umirín átatjame tíaruka ashí aents iimiáiniamunam imianin áiniawai.

• Urúkamtai untsurí tuakmanum wará warát ajataín?

• Testigos de Jehová untsurí tuakártatna nui urúkamtai amesha pujútniuitiam?