Yuusa chichamen yama aatan juárainiakka Hebreo chichamjai, Arameo chichamjai, nuyá Griego chichamjai papiinium áararmiayi. Antsu yamaí tsawantainkia nuú chichamka chichaatsji. Tuma asamtai nukap aents yamainia chichaataijiai Yuús Papiín najánawaruiti. Yaúnchukka Testigos de Jehová chikich aents Yuús Papiín najánkamun unuimiatin ármiayi. Túmaitkiuisha, nuú papií irunmia nuka paant nekaáchmincha tura unuúkamush irúnmiayi. Yuuska ashí aents “nekas chichaman nekaawar uwemprarat” tusa wakérawai (1 Timiutéun 2:4). Tuma asamtai Testigos de Jehová, Yuús Papií Traducción del Nuevo Mundo tana nuna 1950 uwitin sukártutan juárkiarmiayi. Nuú papiinkia iinkís chichamjai najánattsar, Yuusa chichamen yaúnchunia chichamjai aarman ámamkesar unuimiátrarmiayi. Yamaikia Yuús Papií Traducción del Nuevo Mundo tana nuka nukapé chichamnum najánkamuiti.

Yuús Papiikia yúpichuch paant nekaamnia átiniaiti. Yuusa chichamen chikich chichamjai ti yaunchuk aarman nukap waínkiaruiti. Nuú papiinkia ii yachí ámamkesar unuimiatrar, Yuús Papiín Traducción del Nuevo Mundo tana nuna tímiatrusank najánawaruiti. Ainis najánawaru ásarmatai, Yuús Papií nekás chichaman jintínkrateana nuka yúpichuch paant nekaámniaiti.

Yuús Papiikia tímiatrusank unuutsuk aarma átiniaiti. Túmaitkiuisha chíkichkia Yuús Papiín najánainiak, yapajiawar ni enentáimmiariniak aáraruiti. Antsu Testigos de Jehovaka Yuús Papií Traducción del Nuevo Mundo tana nuna najánainiak, Yuusa chichame tana tímiatrusarank aáraruiti.

Yuús Papiín najánainiaka Jehová naarin paant ujúkartiniaiti. (1 Tisarúnikianam [1 Tesalonicenses] 2:13) Yámankamtaikkia Yuusa chichamen aainiak, Yuusa naari Jehová tana nuna ti nukap aárarmiayi. Túmaitkiuisha, untsurí aents Yuús Papiín ni chichámejai najánainiak, Yuusa naari Jehová tana núnaka aárcharuiti. Antsu Testigos de Jehovaka Yuús Papií Traducción del Nuevo Mundo tana nuna najánainiak, Yuusa naari yaunchu aármauyania nuna chikíchkinkisha iniánkatsuk tímiatrusarank aáraruiti (Salmo 83:18). Nunkaani nakumkamu ana nui, Yuusa naari yaúnchunia chichamjai aarma iísminiaitme. Yuús Papií Traducción del Nuevo Mundo tana nuka ámamkesar unuimiatrar pénker najánamu asa yúpichuch aujuújataiti. Aentsú enentáimtairinchuiti, antsu Yuusa enentáimtairiniaiti. Yuús Papií Traducción del Nuevo Mundo tana nu achíakchakmesha, Yuús Papií achíakmena núkesha tuke tsawantin aujkim wetá (Túramu [Hechos] 17:11; Apukarípsis 1:3).

• Urúkamtai Yuús Papií Traducción del Nuevo Mundo tana nu najánamuit?

• Yuús Papií paant nekaattsam tuke tsawantin warí itiúrkatniuitiam?