Juú papiinium nekaamna aíntsaṉk, Yuus Papii jintinkratmaka nuarmin nuyá uchirmin yaiṉkminiaiti, tura aíntsaṉk amincha yainmakminiaiti. Jehováka warasrum pujusmintrum tusa wakérawai. Nuyásha ni enentaimtamu iínkia apujeakrumninkia, utsumamurmin pátasnak amastatajrume turamearme (Mateu 6:33). Yuús ame amikrum ajastasa wakérawai. Tuma asamtai Yuúsa amikrí tuke atasam kakarta, Yuúsa amikrí ajastinkia waríṉkish achiakmajaisha iniaṉkasaiti (Rúkas 10:27).

YUÚS PAPII JINTINKRATMA: Jehová tawai: Atumí Apari̱ átatjai; átumka winia uchir átatrume (2 Kurintiunam [2 Corintios] 6:18). Yuúska ame nekás amikrum ajastasa wakérawai, tuma asamtai ni amikrí ajastasam wakérakmeka, tuke nijiai aujmattsata. Yuúska tuke tsawant iniaitsuk seatiarat tusa wakérawai (1 Tisarúnikianam [1 Tesalonicenses] 5:17). Yuúska, itiúr nekapeaj nuna tura ashí enentaimmiancha ujatkarat tusa wakériniaiti (Jiripiusnum [Filipenses] 4:6). Nuarmijiai tura uchirmijiaish Yuús seakminkia, Yuúska nekás awai ame tu enentaimmian, ni paant nekaawartatui.

Yuús aujsam nuyásha anturkatniuitme. ¿Itiúr anturkattam? Ni Chichame, tura papii Yuús Chichamnumia najánkamu aíniana nu unuimiakum anturkattame (Josué 1:8). Tura unuimiamna nui esetram enentaimsata (Salmo 77:11, 12). Yuús anturkattsam Testigos de Jehová iruntairincha wétiniaitme (Salmo 122:1-4).

Nuyásha Yuúsa amikrí ajastin peṉké iniaisaij takum, chíkich aéntsjai Yuúsna aujmattsata. Nu túratin iniaiyashkumka ni amikrí tuke átatme (Mateu 24:14).

NAJÁNAMNIAITMENA NU:

• Kashi kashinin Yuús seattsam tura Yuúsa Chichame aujsattsam, tsawant aaṉkata.

• Waríṉkish najánatin achiakmajainkia, ame nuwem tura uchiram Yuúsnan nekáska iínkia apujsarat tusam yaiṉkiarta.

YUÚS PAPII JINTINKRATMA: “Yúsa̱i̱ni weamkata tura Nii atumin wearmaktatrume” (Sántiak 4:8). Ame nuwemjiai nuyá uchirmijiai, Yuúsa Chichame urutai tura urutma ekemsamunma unuimiartattrum nu tesarata (Génesis 18:19). Túmaitkiusha aya nuke turawaip, tuke tsawant Yuús kajinmatkip, tura ame nuwem nuyá uchírmesha Yuúsa amikrí ajastinian peṉké iniaisaraiṉk tusam yaiṉkiarta. Yuús Papii tawai, tuke tsawant ame jeemi pujakmesha, jintiá wekaakmesha, kánakmesha, káshik nantakmesha, yawettsuk Jehovánu ame uchiram jintintiáwarta (Deuteronomio 6:6, 7). Yaunchunia aénts Yuúsa enentaimtin, Josué naártin timia aintsamek amesha titiá: “Wikia wí shuarjai Jehován umirkattajai” (Josué 24:15).

NAJÁNAMNIAITMENA NU:

• Ame nuwem tura uchiram chikichkimsam warínia utsumainia nu nekaam, Yuúsa Chichamejai yaiṉkiarta.