Ii je̱e̱n pujuiniana nu waríṉkish utsumainiamu sumarkattsar, mashi kuitkia utsumtainti (Proverbios 30:8). Kuitkia utsumamun ayamprutmaji (Eclesiastés 7:12). Kuitnia aujmattsatin tukeka yupichuch achaiti, túmaitkiusha kuitnia aujmateakrum, kajernaikiairap (Ipisiunam [Efesios] 4:32). Peṉké uurnaitsuk, kuit warínma ajapattarum nu aujmattsatniuitrume.

YUÚS PAPII JINTINKRATMA: ‘Je̱a̱ yakí jeamtaj tusam wakérakmeka, kuítian urutmak ajapawaintiaj tusam tura urutmaja̱i̱ṉk amukaintiaj tusam emka enentáimsashtatmek’ (Rúkas 14:28). Juú kuitjiaish warí itiúrkattaj tusarum aujmattsatarum (Amós 3:3). Warí sumaktin utsumarum nu tura urutma kuitia ajapattarum nusha aujmattsatarum (Proverbios 31:16). Kuit núkap achiakjai tusarum náṉkamsarum ajapawairap. Kuit achiakchiatrum sumakrum, tumashmakairap (Proverbios 21:5; 22:7).

NAJÁNAMNIAITMENA NU:

• Atum utsumamu sumaka amikrúm, kuit ampiniarmatainkia, juú kuitsha itiúrkattaj tusarum aujmattsatarum.

• Kuit jeartamchakrumninkia, utsumachma sumakaij tusarum aujmattsatarum. Tura kuit jeartamchaij tusarum apatuk iniarkamu súmatsuk, atumi je̱e̱n iniarkatarum.

YUÚS PAPII JINTINKRATMA: ‘Nekás chicham chicharnaisatarum’ (Ipisiunam [Efesios] 4:25). Urutmaa kuitia waitmam tura urutmaa kuitia ajapeam nusha ame nuwem uurtsuk ujakta.

Waríṉkish kuitchikcha nu súmatsuk, ame nuwem tuke aniastiniaitme (Proverbios 13:10). Uurnaitsuk kuitnia aujmatkurum, nuatnaikiamunam péṉker pujuttarme. Takakmasam kuit wainmena nuka aya aminiukchaiti, nuwem tura uchirmesha utsumainia nuisha enentaimsata (1 Timiutéun 5:8).

NAJÁNAMNIAITMENA NU:

• Nuwem atsakui urutma kuitia achikminiaitiam turutskesha ame atsakmin, nuwem urutma kuitnia achikminiait nu iínkia aujmattsatarum.

• Kuitnium itiurchat wainkian aujmattsatjai tutsuk iínkia aujmattsatarum.