Nuatnaikiamunam tuke warasrum pujuttsa wakérakrumsha, aya neachma tí itiurchat wainkiarum kuntuts enentaimpramniaitrume (Sántiak 4:14). Túmaitkiusha tí itiurchat katsuntratniunka Yuús yainmakminiaitrume. Nuarmijiai nuyá uchirmijiai Yuús Papii jintinkratma umiakrumka, tí itiurchat wainkiarum waitiakrumsha katsuntrattarme.

YUÚS PAPII JINTINKRATMA: “Yus ámin ti enentáimturmakui ame itiurchatrum ainia nu Yus ashí iiktusta” (1 Pítiur 5:7). Yuúska itiurchatnaka peṉké amakratchaiti (Deuteronomio 32:4). Yuúsai weamkumninkia nekás yainmaktatui (Isaías 41:10). “Ame itiurchat nekapeamurmeka Jehová íktusam iniaisata.” (Salmo 55:22.)

Nuyásha Yuús Papii kashi kashinin aujkum tura unuimiatkum shiir nekaprattame. Nu túrakmeka, ii waitiajnia nui Jehová nekás atsantamji titiatme (2 Kurintiunam [2 Corintios] 1:3, 4; Rúmanam 15:4). Yuúska ame enentaimin wampu nekapratniun, amastatjai turamui (Jiripiusnum [Filipenses] 4:6, 7).

NAJÁNAMNIAITMENA NU:

• Tí kuntuts pujakum wampu nekaprattsam, tura péṉker esetram enentaimsattsam Jehová seata.

• Tí itiurchat wainkiamsha amamkesam enentaimsam, tua nekáska najánamniaitiam nu aitkiata.

YUÚS PAPII JINTINKRATMA: “Esetar enentáimniuka pénker unuimiátki wéak uminiaiti” (Proverbios 18:15). Tí itiurchat naṉkaamakrum, ame nuwem nuyá uchirmesha chikichkimsam itiúr nekapainia tura warínia utsumainia nu mash nekaata. Tura nijiai chichasarta nuyá anturkarta (Proverbios 20:5).

Yaaksha ame aneamu jakámtai kuntuts pujakum natsaraip, Jesússha “úutmiayi” (Juaṉ 11:35; Rúmanam 12:15). Tura núkap ayampratin nuyá kanartincha péṉkeraiti (Márkus 6:31). Nu túrakum itiurchat wainiamu, katsuntratniusha yupichuch aruttramtiatui.

NAJÁNAMNIAITMENA NU:

• Tí itiurchat waintsuk iínkia nuwemjai tura uchirmijiai tuke aujnaisam pujustá. Túrakminkia tí itiurchat akui itiúr nekapainia nuna mash aujtamsartatui.

• Ame itiurchat achiakmena aíntsaṉk chikíchcha naṉkaamasujai aujmattsata.

YUÚS PAPII JINTINKRATMA: “Ii yachijiaisha nankaamas ii nekás amikrí áwiti” (Proverbios 18:24). Ame amikrum yainmakartaj tusa wakériarminiaiti, túmaitkiusha warínmaṉk yaiṉkiaintiaj tu enentaimiarminiaiti. Tuma asamtai warínma yainmakarminiait nu titia (Proverbios 12:25). Tura aíntsaṉk Yuúsa Chichamen iniinit unuimiatra aíniana nu, Yuús Papii jintinkratma itíur umikminiaitiam nuna jintintramawarat tusam aniasarta. Tura nuú jintinkratma umiakum emki wétatme (Santiago 5:14, Traducción del Nuevo Mundo).

Yuúsan enentaimtin aíniajai, tura Yuús chichakmarin nekás umiktatui tu enentaimiainiajai tuke nawamnaiyakmeka, ni yainmakartatui. Tura aíntsaṉk majat pujuiniana nu ikiakakum amesha kakartatme. Jehová urukamtai enentaimtam nu, tura ni chichakmarin umiktatna nusha aujmattsata. Warínmaṉksha chíkich yaiṉktin iniaisaip, nuyá amin anenmainiana tura aíntsaṉk péṉker pujumnium tusar yainmaktasa wakéruiniana nuniasha kanakip (Israernum [Hebreos] 10:25; 1 Kurintiunam [1 Corintios] 15:58).

NAJÁNAMNIAITMENA NU:

• Nekás amikrumjai aujmattsata, tura jintintramkui anturkata.

• Waríṉkish ame utsumamu uutsuk etserkata.