Yuús yamamkamtaik nuatnaikiatniun apujsamia nuinkia, uchinkia ni aparí iisartiniaiti timiayi (Kurusenam [Colosenses] 3:20). Uchirtin asam ámetme, uchiram Jehován aneasarat tusam jintintiatniumka. Tura uunt ajasarsha péṉker arat tusam jintintiatniuitme (2 Timiutéun 1:5; 3:15). Nuyásha ni enentain warínia achiakainia nu nekaatniuitme. Tura nekáska ame eemka péṉker nájanmajai iniakmamsatniuitme. Yuúsa Chichame uchiram unuiniartaj takumka, ame nekáska iínkia Yuúsa Chichame aneakum umiktiniaitme (Salmo 40:7, 8).

YUÚS PAPII JINTINKRATMA: “Wárik chichastin enentáimprairap antsu antuktin emka enentáimprata” (Sántiak 1:19). Uchiram uurtamtsuk mash ujatmakat tusam wakéramna nu péṉkeraiti. Tuma asamtai ni aujtamsartasa wakéruiniakui anturkattsam tsawant tuke sumamsatniuitme. Shiir ajakmiṉkia uchiram aujtamsattsa wakériartatui (Santiago 3:18, Traducción del Nuevo Mundo). Uchiram aujmaitiatam wárik kajekam yajauch turame takumniaka, warínia aujtamsattsa wakéra nuna mashikia ujatmakchattawai. Tuma asamtai aneajrume tuke titin kajinmatkip, tura kajektincha katsuntrata (Mateu 3:17; 1 Kurintiunam [1 Corintios] 16:14).

NAJÁNAMNIAITMENA NU:

• Uchiram aujtamsattsa wakéruiniakui, anturkattsam tsawant sumamsata.

• Uchiram itiurchatan wainkiarmatai aya nui aujmattiasam nákasaip, antsu tuke aujsarta.

YUÚS PAPII JINTINKRATMA: “Ashí aents tí enentáimin ainia nuka ni nékamuriji̱a̱i̱ túrin áiniawai” (Proverbios 13:16). Uchiram aya ánturkaip, antsu amamkesam anturkata. Nekássha waríntia enentaimkiua taa nu nekarata. Uchi natsamaru aíniaka, ékesan náṉkamas tiniu aíniawai. “Antuu ajatsuk chichauka natsanmai ajáwiti.” (Proverbios 18:13.) Tuma asamtai wárik kajekaip (Proverbios 19:11).

NAJÁNAMNIAITMENA NU:

• Uchiram náṉkamas ni wakéramun aujtamkui tsurinkiaip, tura kajekam chara chara ajaip.

• Úchiyamna nui, amesha warí itiurchata wainkiamiam tura itiúr nekapmiam nui enentaimsata.

YUÚS PAPII JINTINKRATMA: “Uchiru, ame apa chichartamna nu umirkata, núnismek ame nuku jintíntramna nusha tuke umirkata” (Proverbios 1:8). Yuús Jehová apujsarma ásarmatai, uchikia ni aparin tura nukurincha umirkartiniaiti. Tuma asamtai maimtek ni uchirin araṉkartin arat tusa tura umiktinniash jintintiawartiniaiti (Ipisiunam [Efesios] 6:1-3). Ni aparí tura nukuríjiai métek enentaimiainiachman, uchikia wárik nékau aíniawai (1 Kurintiunam [1 Corintios] 1:10). Tuma asamtai uchi chicharkatniunam, métek nuú enentaik achiakchakrumsha, atumí uchirí iimiainiamunam kajernaikiairap, nuinchuka aranturmakchattarme.

NAJÁNAMNIAITMENA NU:

• Uchiram itiúr chicharkattarum nu, maimtek aujmatkarum ejetuktarum.

• Uchiram chicharkatniunam maimtek nuú enentaik achiakchakrumsha aujmattsatarum, tura aíntsaṉk métek anturnaikiatarum.

YUÚS PAPII JINTINKRATMA: “Ame uchiram pénker jintintiam tsakatmarta” (Proverbios 22:6). Uchiram uunt ajassha péṉker ati takumka, iínkia itiúr jintintiattam nui enentaimsatniuitme. Uchirtin aíniaka ni uchirin itiúr chicharkartata nunasha aujmattsartiniaiti (Salmo 127:4; Proverbios 29:17). Uchi chicharmaka kakánteamu turutskesha asútiamu aya nukechuiti. Antsu urukamtai umirtukat tusar wakéruinia nuna ni uchirin jintintiawartiniaiti (Proverbios 28:7). Ame uchiram Yuúsa Chichamen aneasarat tusam péṉker jintintiawarta, tura Yuús Papii jintinkratman nuká nukapet péṉker nekaawarat tusam yainkiarta (Salmo 119:97). Nu túrakmiṉkia uchirmeka tuit péṉkersha tura tuit yajauchisha nunasha paant nekaawartatui (Israernum [Hebreos] 5:14).

NAJÁNAMNIAITMENA NU:

• Yuúska awai tuma asa nekás yaiṉkiamniaiti tu enentaimsarat tusam yaiṉkiartiniaitme.

• Yajauchia nu ni enentain enkemtuawar emeskarain tusam, tura Internetnumanisha chíkich aénts nekaattsar enkemtai irunna nuna kishmakarat tusam yaiṉkiarta. Tura aíntsaṉk aénts Internetnumani uchin nawamkar tsanirmau irunainia nuna, peṉkesha nawamkaraiṉk tusam jintintiawartiniaitme.