AKANKAMU 02

Ukunmatai penker pujuttajnia nuna Yuus papii aujmatui

ANTUKTIN, IISTIN

Ashi nunkanam untsuri aents itiurchatan wainkiar kuntuts pujuiniawai tura waitiainiawai nuyasha najaimiainiawai. Amesha ainis nankaamasukaitiam? Sunkurmakmeksha waitiatsmeash turutskesha amee shuar jaka asamtai waitiatsmeash? Ju nunkanam itiurchat irunna nu uruma nui iwiarnartimpiash tu enentaimtsumeash? Yuusa chichame tana nu nekaar shiir enentaimsamniaitji.

1. Yuus papii wariniuna aujmatea?

Urukamtai ju nunkanmasha nukap itiurchat irunea nuna Yuusa chichame aujmateawai. Nuyasha ju nunkanam itiurchat iruneana nuka jukerusan amukattawai tusa ujatmaji. Shiir pujustinian nakastiniaitji Yuusa chichame tana nu amesha nekaamniaitme (Jirimías 29:11, 12 aujsata). Yuusa chichame tana nu neka asar itiurchat wainkiarsha katsuntrattaji tura wara warat enentaimtiatji nuyasha uruma nuinkia tuke warasar pujuttaji tu enentaimsattaji.

2. Yuusa chichamesha uruma nui wari turunattawai ta?

Yuusa chichame junis tawai: “Tura nuik amia nuka ashí amuukarmatai jákatniusha, úttincha, wáitsatniusha tura najaimiatniusha atsuttawai” (Apukarípsis 21:4 aujsata). Itiurchat waitkiarmajnia nuka atsuttawai. Kuitchajai pujamu, itiurchat amajkartamusha, sunkursha tura jakatniusha atsuttawai. Ju nunka shiiram ajasmanum aentska tuke warasar pujuartatui tawai Yuusa chichame.

3. Ukunmatainkia itiurchatka atsuttawai Yuusa chichame tana nu nekasashit?

Nukap aents ju nunkaka iwiarnartatui tu enentaimiainiayat nekasash nusha turunat tu enentaimiainiawai. Yuusa chichamenka nekas turunatniun aujmateawai. Yuusa chichame penker esetrar iisar unuimiakrikia nui tana nuka nekas turunattawai tu enentaimsattaji (Túramuri̱ [Hechos] 17:11). Nu turakum uruma nui turunattana nuka nekasaiti titiatme.

PENKER NEKAATAI

Uruma nui turunatniun Yuusa chichame aujmateana nuna unuimiatratai. Chikich aentscha nuna nekaawar itiura enentaimiainia nu nekaatai.

4. Uruma nui ju nunka shiiram ajasmanum tuke iwiaku pujuttarme Yuus papii tawai

Uruma nui turunatniun jui Yuusa chichame aujmateana nu iista. Tua uminkiat tusam wakeram? Urukamtaiya?

Uruma nui turunatniun Yuusa chichame aujmateana nu aujsarum juna aujmattsatarum:

Yuusa chichame aarma iruneana nui enentaimkium itiur nekapeam? Amee shuarai, ame amikrumin enentaimsata, jui Yuusa chichamen irunna nu ikiakararminiashit?

Uruma nuinkia ju nunka junis atatui:

YAKSHA...	ASHI AENTS...
... waitsashtatui, uuntach ajaschattawai, tura jakashtatui (Isayas 25:8)	... ni shuari ju nunkanman nantakiartatna nuna wainkiartatui (Túramuri̱ [Hechos] 24:15)
... sunkurmak pujaka atsuttawai, tunaamar pujasha atsuttawai (Apukarípsis 21:4; Isayas 35:5, 6)	... sunkurmatsuk pujuartatui, uchi natsamaru aintsan kakaram artatui (Job 33:25 TNM)
... itiurchat amajkartaka atsuttawai (Yus Kanta [Salmo] 94:15)	... yurumkan nukap takuartatui tura ni jeencha takuartatui nuya takakmainiaksha penker warasar takakmartatui (Yus Kanta [Salmo] 72:16; Isayas 65:21, 22)
... mesetan najanuka atsuttawai (Yus Kanta [Salmo] 46:9)	... penker warasar matsamsartatui (Yus Kanta [Salmo] 37:11)
... itiurchat enentaimias waitias pujaka asuttawai (Isayas 65:17)	... ju nunka shiiram ajasmanum tuke iwiaku pujuartatui (Yus Kanta [Salmo] 37:29)

5. Ukunmatai penker pujuttajnia nu nekakur wara warat enentaimminiaitji

Nukap aents itiurchat irunkui kuntuts enentaimiainiawai turutskesha suir enentaimiainiawai. Chikichkia itiurchat atsut tusa warinkish najanainiawai. Uruma nui ju nunka iwiarnartatui Yuus papii tana nusha itiura nukap aentsun ikiakainia nu nekaata. VIDEO iisrum juna aujmattsatarum:

VIDEO: Itiurchat irunmia nuna iwiarattsan wakerimiajai (4:07)

Video iisajnia nui Rafika wari itiurchatna iwiarattsa wakerimia?
Itiurchat irunmia nu amunachkuisha Yuusa chichamen nekaa warintia enentaimia?

Itiurchat wainiakrisha ukunmatainkia ju nunka iwiarnartatui Yuus papii tana nu ikiakatmarminiaitji tura itiurchat wainiakrisha wara warat enentaimsatniun yainmakminiaitji. Nekatai̱n Jintinkiartin [Proverbios] 17:22 tura Rúmanam 12:12 aujsarum juna aujmattsatarum: