Yuúsa anáikiamurinkia nayaimpiniam pujana nuiti, nu akúpniuka juú nuṉkanam akupin áiniana nuna wárik akintruk nayaimpiniam tura nuṉkasha Yuús wakéramun najánattawai. Akupin ati tusa Yuús anáikiamu juú nuṉkan iiyakui mashiniu nawamnaikiar pujustin átatui. Nuka tí shiir chichamaiti ¡nekasapi! Daniel 2:44; Mateu 6:9, 10; 24:14, aujsata.

Yuús Jehová ni Uchirín Jesúsan, ni akúpeamurin, akupin ati tusa anáikiamiayi. Apukarípsis [Revelación] 11:15, aujsata.

Juú video iistá: Yuusa anáikiamurisha itiurkatta?

Yuúsa Uchirínkia waitnenkratin asa nakakeana nunaka imiatrusaṉk tuke najánniuiti tuma asa imiá péṉker akúpniuiti (Juaṉ 1:14). Kakaram asa nayaimpiniam pujus, juú nuṉkan akúpeak aéntsun yaintatui. Jesús nayaimpiniam waka, ni akupin ati tusa Yuús susatniuyania nuna nakastasa, Yuúsa untsuríni pujusmiayi (Israernum [Hebreos] 10:12, 13). Tsawant nankamaki weakui Yuús, Jesúsan akupin ati tusa anáik apujsamiayi. Daniel 7:13, 14, aujsata.

Yuús, warumchik aéntsun nayaimpiniam pujusar, Jesúsjai akupin arat tusa juukuiti (Apukarípsis [Revelación] 5:10). Jesús juú nuṉkanam pujumiania nui, ni unuiniamurinian, warumchiniak akankamiania nunaka apóstoles tiniu áiniawai. Yuúsan peṉké ikiukcharu ásarmatai, Jesúsjai akupin ajasartin nuú aéntsnumian, Yuús juktinian juarkimiayi. Yamaiya juisha, Yuús Jehová áishmannash, nuwáncha Jesúsjai akupin arat  tusa akaneawai. Nuú aéntska jákarka, Jesúsa áintsaṉk nayaimpiniam wenawai. Tura iniashinkia wainkiachmin nase ainis ajainiawai. Juaṉ 14:1-3; 1 Kurintiunam 15:42-44, aujsata.

¿Nayaimpinmash urutmak wearat? Nayaimpiniam weartinkia warumchik áiniawai tawai Yuús Papii. Jesús nuna taku “untsurí̱chuitrume” timiayi (Rúkas [Lucas] 12:32). Jesúsjai, 144 mil aénts juú nuṉkan akupin artatui. Apukarípsis [Revelación] 14:1, aujsata.

Jesús, 1914 uwítin akuptan juarkimiayi, tura emkaka Íwianchin, ni suntarintiuk nayaimpinmayanka jiiki akupak juú nuṉkanam utsamiayi. * Turamu asa tí kajek ashí nuṉkanam itiurchat amajkartawai (Apukarípsis [Revelación] 12:7-10, 12). Nuú tsawantinia juarkimiuk itiurchatka núrant ajakí weawai. Yuúsa akúpeamuri juú nuṉkan iistin nuntumsamtai maniamu, tí uurma, sunkursha, tura tsukamaamush átatui tama, yaunchuk Yuús Papiinium aárma amiayi. Rúkas [Lucas] 21:7, 10, 11, 31, aujsata.

Yuúsa chichame etsermajai, untsurí aéntsun ashí nuṉkanmayan íruawai. Yuúsa akúpeamuri, juú nuṉkanam yajauch iruneana nuna amuakui, nukapé aénts péṉker enentai achiakainia nuka Jesúsan umirainia asar uwemprartatui. Yuúsa akúpeamuri juú nuṉkan iiyakui iisha nui pujutaj takurkia, Jesús umirkatniuitji. Apukarípsis [Revelación] 7:9, 14, 16, 17, aujsata.

Mil uwí Jesús Yuús anáikiamu akupin atatna nuinkia, Yuús wakéramu mash uminkiattawai tura juú nuṉkaka, shiiram nuṉka ajastatui. Nuna tura amuk Jesúska, ni aparí akupin ati tusa susattawai (1 Kurintiunam 15:24). ¿Juú chicham yaaksha ujaktin wakérukainmeash? Salmo 37:10, 11, 27-31, aujsata.