Yuúska ashí aénts seatiarat tusa wakérawai (1 Juaṉ 5:14, 15). Túmaitkiusha ¿ashí seamman antawash? Yuús Papii tawai, áishmaṉk ni nuarin arantachmajai chichareakka Yuúsan seak nui ‘itiurchatan’ wainkiattawai (1 Pítiur 3:7). Israel aénts yajauchin awakeki awakeki najániarmiayi, tumainiakui warínkish seamsha Yuúska antichmiayi. Aénts tunaámak ené enentaimia ajas seamka Yuúska antureawai tuma asa Yuús seamuka tí shiiraiti. Isaías 1:15; 55:7, aujsata.

Juú video iistá: Yuús seam máshiniunash anturniuit?

Jehová seakur iin najákrataiti tama iniakmamji, tuma asamtai aya ninki seatniuitji (Mateu 4:10; 6:9). Tura áintsaṉk, makchartin asakrin, Jesús ii tunaarin akikmaktasa jarutramkamiaji tuma asamtai ni naárijiai seatniuitji (Juaṉ 14:6). Jehováka, nuú chichamnak awakeki awakeki turutiarain tusa nakitiawai, antsu ni enentainia seatiarat tusa wakerawai. Mateu 6:7; ​Jiripiusnum [Filipenses] 4:6, 7, aujsata.

Tákamtak ii enentaimmiajai seamuncha Yuúska antiniaiti (1 Samuel 1:12, 13). Tura, tuinkish pujuiniaksha seatiarat tusa wakerawai. Nantakur, kanartasar, yurumattsarsha turutskesh itiurchat wainkiursha Yuús seatniuitji. Salmo 55:22; Mateu 15:36, aujsata.

Aénts Yuúsan umirainiachu írunmanum pujaji. Tura áintsaṉk, Yuúsa chichamenka waitiaiti tuniajaish irutraji.  Tuma asa Yuúsnum weamkattsar kakamun majat amajtamsamniaitji (2 Timiutéun 3:1, 4; 2 Pítiur 3:3, 13). Tuma asamtai, Kristu aéntstikia iruntrar mai ikiakanai ajatin utsumaji. ​Israernum [Hebreos] 10:24, 25 aujsata.

Yuúsan anenajai irúneakrikia Yuúsnum tí weamkattaji. Nuyá testigos de Jehová iruntairin weakrikia, chikichcha Yuúsan itiúr enentaimtuinia nu iisar, iisha aitkiasrik najánatin wakéruktatji. Rúmanam 1:12, aujsata.

Yuús Papii unuimiatkum esetram enentaimiakum Yuúsnum weamkattame. Ni jintinkiartamurin nuyá turamurin, ni chichakmarincha nui enentaimsata. Esetrar enentaimsar Yuús seakrikia, nekatairi tura tí anenkratmari nekattaji. Josué 1:8; Salmo 1:1-3, aujsata.

Jehová wainchiatar, nekás niyaiti ii Yuúsrinkia taji. Tuma asar uruma nui ni tsankarí amakrattsatana nuka, nekásaiti tu enentaimiaji. Nu kajinmatkij takurkia Yuúsna unuimiatramu esetrar enentaimsatniuitji. Tura ni chichame kashí kashinin aujkur Yuúsnum weamkattaji. Mateu 4:4; Israernum [Hebreos] 11:1, 6, aujsata.

Umínianka Jehová kajinmatchaiti. Nin enentaimtamunam tura tuke iwiáku pujutniunmania, warínkish arant amajtamsamniaitiajnia, nuna Yuúska ayamkartiniaiti (Salmo 91:1, 2, 7-10). Tura sunkuran kishmakar warasar péṉker pujuarat tusa unuikiartiniaiti. Salmo 73:27, 28; Sántiak 4:4, 8, aujsata.