Jesús juú nuṉkanam tatsuk Yuúsa suntari asa nayaimpiniam pujumiayi (Juaṉ 8:23). Jesúska Yuús Jehová eemka najánamu asa ashí irunna nuna najánkatniun yainmiayi. Chikichkiniak niniak nakak najána asamtai Yuús Papiikia “chikichkia nu” tawai (Juaṉ 1:14). Ni aparí chichamen etserka asamtai ‘chicham’ tutainti. Proverbios 8:22, 23, 30; Kurusenam [Colosenses] 1:15, 16, aujsata.

Yuús ni Uchirín, nuṉka akupkamiayi. Nuwa natsa María naártinia wakeen, Yuús, Jesúsa iwiákmari enkeamiayi tuma asa nuṉkania aparín takuchmiayi (Lucas 1:30-35, Traducción del Nuevo Mundo). Jesús juú nuṉkanam menaintiu enentaijiai tamiayi. 1) Yuúsna nekása nuna unuikiarturtasa, 2) itiurchat wainkiursha Yuús wakéramu itiúr najánatniuitiaj nuna iniakmamas ikiuktiasa, 3) ni iwiákmari makchartinchan sukartus uwemtikkiarturtasa tamiayi. Mateu 20:28, aujsata.

Aénts jákarat tura weamrarat tusa Yuúska nu enentaijiai najákratachmiayi. Jehová, Adán naártinian umirtutsuk tunaamkumka jakáttame timiayi. Tunaamkachuitkiunka jákachayi (Génesis 2:16, 17; 5:5). Adán tunaamkamtai, jákatin juarnakmiayi Yuús Papii tawai. Nuú tunaajai ashí aénts tunaartin ajasarmiayi tuma asar mash jákartiniaitji. Tuma asamtai ashí aéntsti uwemtikramu atin utsumaji. Rúmanam 5:12; 6:23, aujsata.

 Jákatniunmania ¿ya ankan amajkartusminiuya? Jakar ii tunaari akikmaji. Makchartin asar chikicha tunaari akikmakchamniaitji. Salmo 49:7-9, aujsata.

Jesúska makchartinchauyayi tuma asa peṉké tunaamkashmiayi. Tunaa najána asa jákachmiayi antsu chikicha tunaarin akikmaktasa jakámiayi. Yuúska ashí aéntsun tí anea asa ni uchirín aéntsun uwemtikrarat tusa akupturmakmiaji. Ni aparín umirkamujai áintsaṉk tunaanumia tura jákatniunmaya uwemtikkiarturtasa ni iwiákmarin sukartus, Jesús anenkratman iniakmamsamiayi. Juaṉ 6:40; Rúmanam 5:18, 19, aujsata.

Juú video iistá: ¿Jesús urukamtai jakámia?

Jesús juú nuṉkanam pujumia nui, Yuúsa umirin áinianun, uruma nui najánattana nuna iniakmak, aénts jainiancha tsuarmiayi. Jákaruncha iniankimiayi tura waitiainiancha yainmiayi (Mateu 15:30,31; Juaṉ 5:28). Yuús, Jesúsan jakán inianki, iniashinkia wainkiachminian susamiayi. (Ipisiunam [Efesios] 1:20). Jesús nayaimpiniam waketki Yuúsa untsuríni pujusmiayi. Ni juú nuṉkanam Akupin ati tusa Yuús susatniuyania nu tsawant jeamam nakasmiayi (Israernum [Hebreos] 10:12, 13). Yamaikia Jesús, nayaimpiniam pujus akúpeawai. Nuna Kristu aénts ashí nuṉkanam shiir chichaman etserainiawai. Daniel 7:13, 14; Mateu 24:14, aujsata.

Yuús, ni uchirín ame Akupin atá tusa susaiti, tuma asa Jesús aénts yajauchin tura waitiamu iruneana nunasha kakaram asa mash amuktatui. Jesús nekás umiktatui tusa umirainiana, nuke juú nuṉka shiiram ajasmanum warasar pujusartatui. Salmo 37:9-11, aujsata.