Jesús ni unuiniamurijiai nekás religiónnum pachitkia armiayi. Tuma asa jintiajai apatak, tuke iwiáku pujutain aujmattsamiayi. Túmaitkiusha nuú jintianmaninkia ishichik aénts wenawai (Mateu 7:13, 14). Yuúska, ni chichamen umirin ainia nunak péṉker iiyawai. Yuús Papii tana áintsaṉk nin nekás enentaimtuiniaka, nuú enentainiak achiaku asar iruntrar pujuiniawai. Salmo 25:5; Juaṉ 14:6; 1 Kurintiunam 1:10, aujsata.

Juú video iistá: Yuús ashí religión ainiana aun pénkerash iiyá?

Yuúsna etserji antar tuiniana nu, waitian unuikiartuniak nekás Kristu aéntsun emeskartatui Jesús timiayi. Nuú aénts, iikia Kristu aéntsuitji tuiniawai. Nekása nuna unuikiartaji tuiniayat, amamkesar iismaka aéntsun anankainiawai. Tura nekás religiónnum pachitkiainia nuka péṉkera nuna nájanmajai, nekás Kristu aénts áiniamun iniakmamainiawai. Mateu 7:13-23, aujsata.

Ya ainia nu nekatasar, 5 enentai iistai:

• Yuús Papiinkia, Yuúsa chichame asamtai tí arantuiniawai. Aénts ni enentaimmiari unuikiartuiniana nuna apapetsuk, Yuúsa chichamen umirkartasa kakainiawai (Mateu 15:7-9). Yuúsa chichamen etserainiana áintsaṉk ni iwiákmarinsha najánainiawai. Juaṉ 17:17; Titiun [Tito] 1:9, aujsata.

•   Yuús Jehová naárin arantuiniawai. Jesús ni aparí naárin etseruk arantamun iniakmasmiayi. Jehovánun, aéntsun ujakmiayi tura Yuúsa naári péṉker ujukamu ati tu seatarum timiayi (Mateu 6:9). Ame pujamna nuisha ¿warí religiónnumia Yuúsa naárin etserainia? Juaṉ 17:26; Joel 2:32, aujsata.

• Yuúsa akúpeamuriniun etserainiawai. Shiir chichaman Yuúsa akúpeamuriniun, Jesús juú nuṉkanam etserkatasa tamiayi. Tuma asa Yuúsa akúpeamuriniun etse etserkua jakámiayi. Nuú akupin juú nuṉkanam itiurchat iruneana nuna amuktatui ​(Rúkas [Lucas] 4:43; 8:1; 23:42, 43). Jesús, Kristu aéntsun, nuú akupma etserkatarum timiayi. Yaaksha ame je̱e̱min Yuúsa chichamen etserkattsa ta, Yuúsa akúpeamuriniun aujtameak ¿warí religiónnumian aminiait? Mateu 24:14, aujsata.

• Juú nuṉkanam aénts warínkish yajauchin najánaina nuna pachintiuiniatsui. Kristu aéntska políticanam tura paro najánmanum pachincha áiniawai (Juaṉ 17:16; 18:36). Aénts yajauchin najánainiana nunaka ninkia najáncha áiniawai. Sántiak 4:4, aujsata.

• Anenkratman paant iniakmamainiawai. Ashí aénts aneasartinian Yuús Papii unuiniararuiti. Antar religión ainiaka maniamunam yaimin áiniawai, antsu nekás religiónka maniamunam pachinchaiti (Miqueas 4:1-3). Tura tsawantan ankawar, ni kuitrijiain tuinkish wear chíkich aéntsun, Yuúsnan unuiniainiawai. Juaṉ 13:34, 35; 1 Juaṉ 4:20, aujsata.

¿Warí religión Yuús Papiijiai unuikiartuinia? ¿Warí religión Yuúsa naárin arantuinia? ¿Warí religión aya Yuúsa akúpeamurin itiurchat irunna nunaka amuktatui tu etserainia? ¿Warí religión nekás mai anenai ajamun iniakma tura maniamunmash pachinchait? ¿Amesha warínmea? 1 Juaṉ 3:10-12, aujsata.