Shiir chichamka, warau Yuúsnumia winiawai, tuma asa nuatnaikiaruka waras pujusarat tusa wakérawai (1 Timoteo 1:11, Traducción del Nuevo Mundo). Nuatnaiyamunka Jehová apujsaiti. Yuús umirkattsar wakérakrikia, naamkaru ainia, chichaman najánawarua nu umirkatniuitji. Nu turakrikia péṉker nuatnaiyaji. Tura ii uchirísha péṉker warasar tsakakartatui. Tuma asamtai registro civil wéri nuatnaikiatniuitji. Rúkas [Lucas] 2:1, 4, 5, aujsata.

Nuatnaikiaruka kanakchartiniaiti, tawai Yuús. Áishmaṉk nuatka, nuwa nuatnaikiasha tsanirmachartiniaiti, Yuús tawai (Israernum [Hebreos] 13:4). Ajapnaiyamunka peṉké muijmiai, Yuús iiyawai (Malaquías 2:16). Túmaitkiusha nuatnaikiamunam aya tsanirmamu akuin ajapnaiyawarar chikichjaish nuatnaikiarminiaiti. Mateu 19:3-6, 9, aujsata.

Áishmaṉk ni nuweejai yainiaikiarat tusa Jehová najánamiayi (Génesis 2:18). Áishmaṉka ni je̱e̱nian emtuk juwiti, tuma asa takatán eak yurumkan tura utsumamunsha mash susatniuiti. Áintsaṉk nuarin, tura uchiríncha Yuúsnan unuiniartiniaiti. Nuarin anea asa niniunak enentaimtumaschatniuiti. Nuatnaikiaruka anenaisar tura arantunaikiartiniaiti. Makchartin ainiayat, waras pujustaj tuiniakka tsankurnairatniun unuimiatrartiniaiti. ​Ipisiunam [Efesios] 4:31, 32; 5:22-25, 33; 1 Pítiur 3:7, aujsata.

Itiurchatan wainiainiaksha, anenaiyamujai péṉker amajnaisartasa kakarartiniaiti (1 Kurintiunam 13:4, 5). Yuúsa chichamenka, nuatnaikiamunam itiurchat wainiakrum kanaktiniaitrume tatsui. 1 Kurintiunam 7:10-13, aujsata.

Uchisha warasar pujusarat tusa Jehová wakérawai. Tuma asa tsakaki wenak péṉker pujusarat tusa unuiniawai. Tura áintsaṉk uchikia aparí warínkish nékamun unuimiatrar péṉker pujusarat tusa wakérawai (Kurusenam [Colosenses] 3:20). Yuúska winia enentaimturainiak tura uchirun umirainiak warawarat nekapiarat tusa wakérawai. Eclesiastés 11:9–12:1; Mateu 19:13-15; 21:15, 16, aujsata.

Uchirtinkia yurumkan, pushincha tura tui pujusartiniait nunasha susartiniaiti (1 Timiutéun 5:8). Tura Yuúsan aneastinian nuyá umirkatniun unuiniarartiniaiti (Ipisiunam [Efesios] 6:4). Uchisha, aparí nuyá nukurí Yuús aneamu iniakmamainiakuinkia, nuna iisar aitkiasan Yuúsan aneasartatui. Nuyá Yuúsa chichamejai unuiniamka péṉker enentaimin ártatui. Deuteronomio 6:6, 7; Proverbios 22:6, aujsata.

Uchirtin ainia nuka, ni uchirí péṉkeran najánainiakui, tuke ikiakarar wararsartiniaiti. Túmaitkiusha, yajauchia nuna najánawarain tusa chicharkartiniaiti tura asutiatin akuinkia asutiawartiniaiti (Proverbios 22:15). Túmaitkiusha asutiainiaksha, kajekmajai pujua pujua amajchartiniaiti. Kurusenam [Colosenses] 3:21, aujsata.

Uchirtin áinianun tura uchiniunsha, testigos de Jehová áiniana nu, papiin najánkaruiti. Nuú papiikia, Yuús Papiinmaniajai najánkamuiti. Salmo 19:​7, 11, aujsata.