AKANKAMU 13
Yuús Papiisha religión áiniana nu ¿urukawartatui ta?
1. ¿Ashí religión péṉkerash ainia?
Ashí religiónnum aénts nankamaku enentaimchash nuyá nekás chichaush iruneawai. Nuú aéntsun Yuús yaintasa wakerawai. Túmaitkiusha nukapé aénts, religiónka pachisar tí yajauchin najánkaruiti (2 Kurintiunam 4:3, 4; 11:13-15). Untsurí religión mankartamunam nuyá uchincha violajainiamunam pachiniainiamu televisiónnum iniankainiawai. Aénts péṉker enentain achiakainiaka nuna ántuiniak religiónnaka peṉké nakitiainiawai. Mateu 24:4-5, 11, 12, aujsata.
Nekás religiónka Jehován arantawai antsu antar religiónka Yuúsan natsan amajainiawai. Yuús Papiinmayachun waitian Yuúsnancha nuyá jákarununcha unuikiartuiniawai. Túmaitkiusha nekása nuna aénts nekawarat tusa Jehová wakerawai. Salmo 146:4; 1 Timiutéun 2:3-5, aujsata.
2. Religión ainia nu uruma nuish ¿urukawartatui ta Yuús Papiisha?
Núkap aénts Yuúsan aneaji tuiniayat yajauchin najánainiana nuka Íwianch wakéramun najánainiawai, túmaitkiusha Yuúska mash wainiawai (Sántiak 4:4). Antar religiónka ‘Uunt Babilonia’ áiniawai tawai Yuús Papii. Yaunchuya irutkamu Babilonia amia nunia antar religión juarnakmiayi. Antar religión aéntsun anankawar itiurchat amajainiana nunaka, Yuús wárik amuktatui. Apukarípsis [Revelación] 17:1, 2, 5, 16, 17; 18:8, aujsata.
Antar religiónnum aénts péṉker enentain achiaku iruneana nuna Jehová íruawai. ¿Itiúrkan írua? Nekása nuna unuiniar íruawai. Miqueas 4:2, 5, aujsata.
3. Aénts péṉker enentain achiakainia ¿warínia najánawartiniait?
Nekás religiónka nawamnaikiar shiir pujustinian yainkrateawai
Nekása nuna aneanka tura péṉkeran najánatasa wakéranka Jehová tí enentaimtawai. Tuma asamtai antar religiónka ikiuktia tusa utsuawai. Nekás Yuúsan anenakka, Yuús wakéramun najánawartiniaiti. Apukarípsis [Revelación] 18:4, aujsata.
Yaunchusha, núkap aénts péṉker enentain achiakuka, Yuúsa chichamen apóstoles ujakaram ni iwiákmarin yapajiawarmiayi. Péṉker pujuarat tusa Jehová unuiniararmiayi. Yaunchunia aénts itiúrkarmia áintsaṉk iisha Yuús Papiinium tana nu nekaar ii iwiákmari yapajiar, Jehová umirkatniuitji. 1 Tisarúnikianam [1 Tesalonicenses] 1:8, 9; 2:13, aujsata.
Antar religiónkan ikiukí, nekás religiónnun pachiniainiakuinkia Yuúska warawiti. Nekás religiónnum pujuiniaka Yuúsa amikrí ajainiawai. Tura Kristu aénts áiniana nuna amikrí ajasar, nuyásha tuke iwiáku pujusartatui. Nuú tsanka pachintiuktin amesha ¿wakérukainmeash? Márkus 10:29, 30; 2 Kurintiunam 6:17, 18, aujsata.
4. Ashí nuṉkanam warasar tura nawamnairar pujamu ati tusa Yuús ¿waríniak najánat?
Antar religión áiniana nuna Jehová amukmatai, juú nuṉkanam warasar péṉker matsamsartatji. Religión anankartin tura itiurchat amajkartin atsuinia ásarmatai, aya chikichik nekás Yuús enentaimtittiaji. ¡Nuchakai nekás shiir chichamka! Apukarípsis [Revelación] 18:20, 21; 21:3, 4, aujsata.
