Yuúska aénts péṉker waras pujusarat tusa wakérawai. Aéntsun aneak, nuṉkan tura ashí jui irunna nunash najánaiti. Uruma nui ashí nuṉka matsatka nunia, aénts péṉker pujuarat tusa Yuús waitiamun wárik amuktatui. Jeremías 29:11, aujsata.

Aénts naamka áiniana nuka, kajekár itiurchat amajkartin áiniana nuna, sunkurnash, jákatniunsha amuktinian tujinkiaruiti. Túmaitkiusha shiir chicham awai: Yuús wárikmas, aénts akupin ainia nuna amú amus ni akúpeamurin anáik apujsattawai. Niin enentaimtin áiniana nuka nawamnaikiar tura sunkurmatsuk pujusartatui. Isaías 25:8; Daniel 2:44, aujsata.

Juú nuṉkanam waitiamu irunin tusa Yuús aénts yajauch áinianka amuktatui (2 Pítiur 2:9). Nusha ¿urutain turat? Yamaiya jui aénts itiurchatan wainiainiak waittsartinian Yuús Papii timiayi. Nu ímiatrusaṉk uminkí weak, waitiamun Yuús amuktatna nu peṉké nuntumsan iniakmawai. 2 Timiutéun 3:1-5, aujsata.

Yuús Papii unuimiartiniaitji turakur Yuúsna nekattaji. Yuús Papiikia apa ni uchirín aneak papiin aátar akuptana aintsaiti. Yamaiya jui itiúrkaria péṉker pujusminiaitiaj tura uruma nui tuke iwiáku pujustasar warí itiúrkatniuitiaj nunasha turamji. Yuús tsankarin sukartustatna nuka ¿nekasapi imiá péṉkeraitia? Unuimiakmin mashikia péṉker iirmaschartatui, túmaitkiusha Yuús Papii unuimiamu iniaisaip. Proverbios 29:25; Apukarípsis [Revelación] 14:6, 7, aujsata.