Tí shiir chicham, juú nuṉka shiiram ajasmanum pujustin tamaka Yuús Papiinium aárma awai (Salmo 37:27-31). Yuús 40 aéntsun juuk, ni chichamen 66 papiin aámtikrarmiayi. Moisés emka ewej papiin aármiania nuka 3.500 uwí nankamasuiti. Tura apóstol Juan amuamunmanka aármiayi, ni aármaka 1.900 uwí nankamasuiti. Yuús Papiinium aárma nuka Yuús enentaimmia aármaiti (2 Samuel 23:2). Yuús Papiin, aénts aárarua nuka ni enentaimmiarinkia aárcharuiti antsu Yuúsa kakarmarijiai, Yuús enentaimmian aáraruiti tuma asa Yuús Papiikia, Yuúsnumia winiáwai. Túramuri̱ [Hechos] 3:21, aujsata.

Juú video iistá: ¿Yuús Papii tunía winiá?

Yuúsnumia winiá asamtai nekásaiti tají. Aéntska uruma nui nankamastinia nuna timiatrusaṉk titinniaka jeatsui antsu Yuús Papiikia uruma nui nankamastin aármaka timiatrusaṉk uminiaiti (Josué 23:14). Aya Yuúsak tí kakaram asa nuna najanniuiti. Isaías 42:9; 46:10, aujsata.

Watskea enentaimsakia, Yuúsnumia papii winiá ¿urukuk aminiait? Papii aénts aákma iruneana nunasha iniankasapi aminiaitia. Yuús Papiikia 450 chichamjai íniankasan nukapé nupanti sukartusmaiti. Yakí tura nuṉka irunna nuna unuimiatin aénts tuiniana áintsaṉk Yuús Papiisha yaunchuniaitiat nisha imiatrusaṉk tawai. 40 aénts, metek pujus aárcharuitiat nuú enentainiak aáraruiti. * Yuús Papiikia, Yuús anenkratman iniakmawai, áintsaṉk aéntsu enentai  yapajtiuatniun, kakarman achiakui. Tuma asamtai nukapé aénts Yuús Papiikia nekás Yuúsa chichamente tuiniawai. 1 Tisarúnikianam [1 Tesalonicenses] 2:13, aujsata.

Juú video iistá: Yuús papiinium ana nu ¿urukamtai nekásaiti timiniaitiaj?

Yuús Papiinmanka aya péṉker chichamak awai. Áintsaṉk Yuús, aéntstin urukamtai najátmaitiaj nuna aujmatui. Juú nuṉkan tí péṉker amajas Yuús susamaitiat aénts emenkakmiania nunasha aujmatui. Tura áintsaṉk juú nuṉkan itiúr iwiaratta nunash aujmateawai. Apukarípsis [Revelación] 21:4, 5, aujsata.

Yuús Papiinmanka warí najánatniuitiaj tura Yuús chichakma nu umiktin, nuyá chicharkartamush awai. Nuyásha Jehová yaunchuk aéntsun itiúr iismia nunash turamji, tuma asa Yuús Papiikia ni urukuit nu nekatniun yainmaji. Áintsaṉk itiúrkaria ni amikrí ajasminiaitiaj nunash unuitiamji. Salmo 19:7, 11; Sántiak 2:23; 4:8, aujsata.

Jesúska Yuús Papii akantramurin tishipias amankes jintinkratmiayi. Juú papiikia Jesús jintinkratmia áintsaṉk Yuús Papii péṉker nekatniuin yainmaji. ​Rúkas [Lucas] 24:27, 45, aujsata.

Yuús shiir chichaman takurtamkajnia nu, amesh nu núkap nekatin wakéruktatme. Túmaitkiusha Yuúsa chichamen imian iiniachush tura chíkichkia nakitiainiash irunui. Nu tumainiakui amesha Yuúsa chichame unuimiartin iniaisaip. Yuús Papii tawai, aya Yuúsa chichamen unuimiainiak tuke iwiáku pujusartatui. Juaṉ 17:3, aujsata.