AKANKAMU 8
¿Urukamtai Yuús yajauchin tura waitiamun ati tusa iniaiya?
1. ¿Yajauch itiúr juarnakmia?
Aénts naamka akupkartin áiniana nu itiurchatan ¿iwiararukait?
Íwianch waitruamtai juú nuṉkanam yajauch juarnakmiayi. Yuúsa suntarí peṉké makchartinchauyayi tumaitiat ‘nekása nuna nakitramiayi’ (Juaṉ 8:44). Aya Yuúsak enentaimtusma átiniuyania nuna Íwianch nékayat, winiash enentaimtursarat tu enentaimmiayi. Yuúsnaka umirtsuk winia umirtukat tusa Íwianch waitrua Evan anankamiayi. Adán nuarin anturak Yuúsan umirkachmiayi. Nu turunamujai waitiamu tura játai awai. Génesis 3:1-6, 19, aujsata.
Íwianch Eva naártinian ananka, Yuúsa nemasrí ajasmiayi. Tura Jehová akupin atiniuyania nuna nakitramiayi. Íwianch Yuúsan nakitramia áintsaṉk untsurí aénts, Yuúsa nakitraru asarmatai Íwianchkia “Jú̱ nuṉkanmaya̱” akupin ajasuiti. Juaṉ 14:30; 1 Juaṉ 5:19, aujsata.
2. ¿Adán nuyá Eva naartinjiai yajauchíyash najánamu ármia?
Yuús Jehová mash tí péṉker najánkamiayi. Adán nuyá Eva tura Yuúsa suntarisha, Yuúsan umirkatin ármiayi (Deuteronomio 32:4, 5). Yuúska péṉkera nuna najánawarat tusa útsutmachuitji, antsu ninki ni iwiákmarin warínia najánawartasa wakéruinia nuna najánawarat tusa ankan iniaitiamsaitji. Nuú ankantan amakrattsa asamtai umireakrikia ni aneamu iniakmamji. Sántiak 1:13-15; 1 Juaṉ 5:3, 4, aujsata.
3. Waitiamun Yuús ¿urukamtai ati tusa iniaiya?
Umíniatsna nuna Jehová tuke katsuntu pujushtatui. Akúpkartin áiniana nu, Yuús yayachma asar aéntsun péṉker iistinian jeainiatsui. Nu paant nekamu juakat tusa, Yuús waitiamu ati tusa iniaiyawai (Eclesiastés 7:29; Salmo 146:3). Akupkartin ainia nuka, yajauch turamun, mesetnash, sunkurnasha amuktinian tujintiainiamu 6 mil uwí nankamaki weawai. Jeremías 10:23; Rúmanam 9:17, aujsata.
Yuús akúpkartukat tusar iniaiyakrikia, ni yainmaktatji (Deuteronomio 5:28-31). Aénts naamka akúpkartamun, Jehová amuktatna nuú tsawant jeatin nuntumsayi. Yuúsa akúpeamurin yayainiana nuke juú nuṉkanam pujusartatui (Isaías 11:9). Daniel 2:44, aujsata.
Juú video iistá: Uruamtaink Yuús wáitsarat tusa iniaitiamsaitiaj?
4. Yuús yajauchin amuktin tsawant jeatsain ¿warí najanatniuitiaj?
Aéntska peṉké antraṉk Yuúsan umirchaiti Íwianch timiayi. Túmaitkiusha Yuús katsunteakui, mashiniu ii iwiákmarin itiúr iniakmameaj nujai Íwianchkia waitriniaiti taji. Tura Yuúsa akúpeamuri yayakur aénts naamka akupkartamu yayachma iniakmameaji. Job 1:8-12; Proverbios 27:11, aujsata.
5. Yuús yayamu ¿itiúrkaria iniakmamsamniaitiaj?
Ii najánmarijiai Yuús akúpeamu yayámu turutskesh nakitiamuksha iniakmameaji
Eemkaka, Yuús itiúr enentaimtursarat tusa wakéra nu nekatniuitji. Tura Yuús Papiijiai, nekás religión jintinkratainiana nu iisha najánatniuitji (Juan 4:23, Traducción del Nuevo Mundo). Aénts naamka akupkartamunam, mesetnumsha Jesús pachinchamiania áintsarik najánkurkia, Íwianch akupkartamu kishmamu iniakmamsattaji. Juaṉ 17:14, aujsata.
Ashí yajauchia nuna najánawarat tusa Íwianch aéntsun utsuawai. Yajauchia nu kishmakrin ii amikrínsha tura ii shuarkesha wishikramrarminiaitji turuskesh kajertamiarminiaitji (1 Pítiur 4:3, 4). Yuúsan anenana nujai nawamnaikiata turam Yuús umirkata. Yaaksha itiurchatan wainkiunka Yuúsnaka umirkashminiaiti Íwianch timiania nuka, nekáschaiti. Yuús umirkumka Íwianch waitramu paant nekaamu juaktatui. 1 Kurintiunam 6:9, 10; 15:33, aujsata.
Yuús anenkratin asa waitiamun tura yajauchincha amuktatui. Yuús nekás turattawai tusa yayá nuka juú nuṉkanam tuke iwiáku pujuttawai. Juaṉ 6:40, aujsata.
