Jehováka ii aparíyaiti, ni najákrata asa nekatairijiai nankatamji. Anenkrata asa iin enentaimturmaji. Tuma asa Yuúsjainchu pujusarat, tusa najátmachmiaji (Jeremías 10:23). Uchi, aparín yainkiat tusa utsumana áintsaṉk aéntstisha Jehová yainkiat tusar utsumaji (Salmo 32:8). Yuúsa Papiirin umiktin chicham ana nuka, Yuús suramsaitji. Salmo 119:105, aujsata.

Yuús akupkamu chicham yamai péṉker pujustinian yainmaji. Tura uruma nui Yuúsa tsankarí itiúr wainkiamniaitiaj nunasha jintintramji. Nuyá ni najákrata asamtai jintinkratmari warasmajai umirkatniuitji. Salmo 19:7, 11; Apukarípsis [Revelación] 4:11, aujsata.

Yuús Papiinium akupkamu chicham ana nuka, chikichkimias warí najánatniuitiaj nuna turamji (Deuteronomio 22:8). Tura Yuús Papiinium chicham jintinkratma iruneana nuka, warínmansha, itiúr najánamniaitiaj nu nekatniun yainmaji. Tuma asamtai Yuús Papiinium chicham jintinkratma iruneana nu itiúr umikminiaitiaj, nu nekatasar esetrar enentaimsatniuitji (Proverbios 2:10-12). Watskea enentaimsatai, ii iwiákmarinkia Jehová amasuitji tawai Yuús Papii. Nuú chichamka takatnum, ii je̱e̱n esetrar turatniun nuyá tuinkish weakrisha anearar wekasatniun yainmaji. Túramuri̱ [Hechos] 17:28, aujsata.

Jesús jintinkratuk, Yuús akupkamu chichaman jimiaran pachismiayi. Eemka pachismia nuka, urukamtai iwiáku pujaj nuna unuitiamji. Yuús nekatniun tura aneastinian nuyá peṉké ikiukchatniun unuitiamji. Ii iwiákmarin warínkish najánatasar Yuús akupkamu chichamnum, nui enentaimsatniuitji (Proverbios 3:6). Nu turakur Yuúsa amikrí ajasar, warasar tuke iwiáku pujuttaji. Rúkas [Lucas] 10:27, aujsata.

Chikichnash timiayi, chíkich aéntsjaisha péṉker amajnaisatniun jintinkiartamun (1 Kurintiunam 13:4-7). Nu najánkurkia, chíkich aéntsjaish péṉker amajnaisatarum Yuús tana nu umirkattaji. Mateu 7:12; 22:39, 40, aujsata.

Nuatnaikiaru áiniana nu, anenkratmajai péṉker amajnaisar pujustinian unuiniawai (Kurusenam [Colosenses 3:12-14). Nuatnaikiaruka peṉkesha ajapnaiyachartiniaiti, tawai Yuús Papii. Nuna najánainiakka apa, nuku, uchiríjiai péṉker pujuarminiaiti. Génesis 2:24, aujsata.

Yuús akupkamu chicham umiamuka takat wainkiatniunam tura warasar pujustinian yainmaji. Takatan nerenniurinkia, aénts péṉker takakman, kasamchan takatan susattsa wakéruiniawai (Proverbios 10:4, 26; Israernum [Hebreos] 13:18). Yurumkasha nuyá entsataisha tura jea pujustin takakkurkia nujain warasar pujustiniaitji, tu unuikiartawai Yuúsa chichame. Nuyá aya takatnumaṉk enentaimtsuk, nekáska Yuús wakéramu najánatniuitji. Mateu 6:24, 25, 33; 1 Timiutéun 6:8-10, aujsata.

Yuús akupkamu chicham umiakrikia ii iniashincha tikia sunkurmakchatniun yainmaktatji. Yuús Papiinium nampekairap tana nu umiakrikia sunkurmaktin kishmaktatji nuyá itiurchatnumsha enkemkashtatji (Proverbios 14:30; 22:24, 25; 23:20). Yuús Papiikia, awarin ishichik umartin yajauchiti tatsui, antsu nampektin yajauchiti tawai (Salmo 104:15; 1 Kurintiunam 6:10). Yuús Papiikia ii urukuitiaj nu tura ii enentaimmiarisha iimiastinian yainmaji (Salmo 119:97-100). Nekás Kristu aéntstikia iiniuk enentaimsar umiatsji antsu Yuús paant amajsattsar umiaji. Mateu 5:14-16, aujsata.