Yuús Papii ishichik unuimiarajnia nujai Jehová, nu núkap aneastin juarkinme. Túmaitkiusha nuin iniaisashtiniaitme, antsu nu núkap nekaki wetiniaitme (1 Pítiur 2:2, 3). Yuúsa chichame unuimiakum Yuúsai weamkattame, nu turakum tuke iwiáku pujuttame. Juaṉ 17:3; Jútas 21, aujsata.

Yuúsna nekaki weakum, nekás enentaimjiai, Yuús waramtiksatin wakéruktatme (Israernum [Hebreos] 11:1, 6). Nekás enentaimjiai Yuús weamtuktaj tusam wakéramu nu utsutmakui, ené enentaimia ajasam yaunchu yajauch najántai ikiukim péṉkera nu najánattame. Túramuri̱ [Hechos] 3:19, 20, aujsata.

Shiir chicham etserkattsar mash wakérutainti, áintsaṉk amesha nekámna nu chíkich aénts ujatktasam wakératsmeash. Yuús Papii unuimiaki weakum amesha péṉker Yuúsa chichamejai Yuúsna aujmattsatin nekattame. Nuyá Yuús warínia najánatta nuna, aénts péṉker unuiyartin nekattame. Rúmanam 10:13-15, aujsata.

Amee shuarmijiai tura amikrumjai, Yuúsna aujmattsatin juarkimniaitme. Tura etserkumsha, anenkratmajai nuyá arantamujai etserkata. Ame religiónrumka péṉkera nuna najánainiatsui tutsuk nekáska Yuús uruma nui najánattana nu aujmattsata. Ame najánmarmijiai péṉker iniakmameakminkia chíkich aénts nuna iisartatui. 2 Timiutéun 2:24, 25, aujsata.

Yuús Papii unuimiatkumka, Yuús enentaimtamunam emki  wetatme. Nuyá Yuúsa amikrí ajastatme. Tura ni uchiríya ainis ajastin jeame. 2 Kurintiunam 6:18, aujsata.

Yuúsa chichame unuimiamna nu iniaisaip (Israernum [Hebreos] 5:13, 14). Testigos de Jehová áiniana nu, Yuúsa chichame, papii ¿Qué enseña realmente la Biblia? tana nujai unuitiurta titia. Yuúsa chichame nu núkap unuimiatkumka warasam pujustatme. Salmo 1:1-3; 73:27, 28, aujsata.

Shiir chicham Yuús Papiinium ana nuka, warau Yuúsnumia winiawai. Yuúsa umirainiajai irúnkumka amesha Yuúsa amikrí ajastatme (Israernum [Hebreos] 10:24, 25). Jehová wakéramu najánki weakmeka Yuúsa amikrí ajastatme. Nu turakum tuke iwiáku pujuttame. Titiun [Tito] 1:2, aujsata.