AKANKAMU 09
Yuus seakur ni amikri atatji
Warinkish turatniun yaksha jintintruat tusam wakeramek? Ame enentaimiamu nekaattsam wakeramu tujinkiakaitiam? Ikiakatrarat tusam wakeramek? Yuus enentaimtakum shiir enentaimsattsam wakeramek? Jehová yainmakminiaiti tumaitkiusha itiura Yuussha seatniuitiaj? Mash aents seainiamun Yuus antiniashit? Yuus seamna nuna ni antawash nusha itiura nekaamniaitiam? Nu nekaatai.
1. Ya seatniuitiaj? Yuus seakur warinminiaitiaj?
Aya ii apari nayaimpiniam pujana nuke seatniuitji Jesús tu unuikiarturmiayi. Jesussha Yuusan sea wemiayi. Jesús junis timiayi: “Nu asamtai Yus áujkuram jú̱nis títiniaitrume. ‘Ii Aparí̱ Yus, nayaimpiniam pujamna nu, ii Aparí̱nme’” (Matéu 6:9). Jehovajai aujmatkurkia ni amikri tuke atatji.
Yuus seakrikia ii enentaimmia mash timiniaitji tumaitkiusha Yuus yainkiat takurkia ni wakeratsna nuka seashtiniaitji. Yuusa chichame tawai: “Yus wakeramuja̱i̱ métek seakrinkia anturtamji” (1 Juaṉ 5:14, 15). Yuus seakur waritminiaitiaj nuna Jesús unuikiarturmiayi (Matéu 6:9-13 aujsata). Aya iiniuk seashtiniaitji antsu ni itiura yainmakuitiaj nui enentaimsar yuminsatniuitji tura chikich aentscha yainta tu seatniuitji.
2. Yuussha itiura seatniuitiaj?
Yuusa chichame tawai: “Maa, aentstiram ashí tsawant Ni enentáimtusrum nákastarum túrarum atumí itiurchatri̱ ujaktarum” (Yus Kanta [Salmo] 62:8). Tuma asamtai Yuus seakrikia nekas enentaijiai seatniuitji. Kakarar chichasar seamniaitji turutskesha takamtaksha seamniaitji. Tsuntsumsar turutskesha yakini iimsarkesha arantamujai Jehová seamniaitji nuyasha urutainsha tura tuinsha pujakrisha seamniaitji.
3. Yuussha ni seakrin itiura yainmaj?
Warijiainsha yainmaji. Ii enentaimiajnia nunasha ni chichamejai nekaatniun yainmaji. Yuusa chichame aujeakrikia neka atatji (Yus Kanta [Salmo] 19:7; Sántiak 1:5 aujsata). Itiurchat nankaamakrincha Yuuska shiir enentaimsat tusa yainmaktatji nuyasha nin enentaimtuiniajaisha yaimakminiaitji.
PENKER NEKAATAI
Yuus seakur shiir enentaimtiksattsar itiura seatniuitiaj tura Yuus seam itiura enentaimprattaj nu nekaatai.
4. Yuus anturtukat tusar wari najanatniuitiaj?
Wari najankurnia Yuussha ii seamman antuktata? VIDEO iistarum.
Jehovaka aya winiak seatiarat tusa wakerawai. Yus Kanta [Salmo] 65:2 aujsarum juna aujmattsatarum:
-
Yuuska seamun antin asa amincha seatit tusa wakerawash? Nusha urukamtai ainis enentaimiam?
Yuus anturtukat takurkia ni tana nu umiktiniaitji. Mikías 3:1-4 tura 1 Pítiur 3:10-12 aujsarum juna aujmattsatarum:
-
Yuus anturtukat takurkia wari najanatniuitiaj?
Suntar chikich nunkanmaya suntarjai manikiar awakmakartasa Yuusan seainiakui Yuus anturkarminiashit?
5. Ii nekas enentaimmia Yuus seatniuitji
Nukap aentsun atak awainkir atak awainkir aya nuke Yuus seatniun unuiniararuiti. Yuussha ainis seatiarat tusa wakeriniashit? Matéu 6:7 aujsarum juna aujmattsatarum:
-
Yuus seakur atak awainkir nuke seawaij tusar wari itiurkamniaitiaj?
Atak awainkim atak awainkim aya nuke Yuus seawaij tusam kashi kashinin warinkish penker nankaamamna nui enentaimsam Yuus yuminsata. Watskea chikichik atsakamunam ainis turata.
Apa ainiana nuka ni uchiri ni enentaimmian aujtusat tusar wakerin ainiawai. Jehovasha aintsan ii enentaimmian aujtusarat tusa wakeriniaiti.
6. Yuus seakur kakarminiaitji
Ii iwiakmarin itiurchat nankaamakur Yuus searsha itiura kakarminiaitiaj? VIDEO iistarum.
Yuus seakur shiir enentaimsamniaitji tawai Yuus papii. Jiripiusnum [Filipenses] 4:6, 7 aujsarum juna aujmattsatarum:
-
Yuus seawakrin ii itiurchatri nuchamtaik menkakashtatui tumaitkiusha Yuus seatniush urukamtai penkerait?
-
Wariniua Yuus seatin wakeram?
Jusha nekaata
Yaunchunia aents Yuusan enentaimtin armiania nusha Yuusan sea amuiniak ainis ati tiniu armiayi (Neemías 8:6).
7. Yuus seattsam tsawan aankata
Warinkish najanatin nukap achiaku asar Yuus seatin kajinmattainti. Jesús Yuusan seattsa warinia najan wemia? Matéu 14:23 tura Márkus 1:35 aujsarum juna aujmattsatarum:
-
Jesussha Yuusan seattsa warinia najan wemia?
-
Amesha tsawan aankam Yuus seattsam wari najanamniaitiam?
CHIKICHKIA JUNIS TINIU AINIAWAI: Yuuska seamsha yainkratchaiti.
-
Amesha warintinmek?
WARI NEKAAM
Yuus nekas enentaijai seakur ni amikri ajastatji nuyasha Yuus seakur shiir enentaimsattaji tura penkera nu najanatai tusar kakartatji.
Awakeasrik nekaatin
-
Ya seatniuitiaj?
-
Yuus seakur itiurkamniaitiaj?
-
Yuus ni seakrin itiura yainmaktataj?
NUKAP NEKAATA
Nukap aents Yuus seamun nuna anintrin ainiana nu Yuus papiinium nekaata.
Amesha urukamtai Yuus seatniuitiam tura itiura Yuus penker seamniaitiam nu nekaata.
Ya seatniuitiaj nuna Yuusa chichame tana nu iista.
Santo tiniu ainiana nu seatin penkerashit? (jw.org nui aarma irunu)
Yuussha urutainia tura tuimpia seatniuitiaj?
