AKANKAMU 11

Yuusa chichame aujsattsar wari itiurkatniuitiaj?

ANTUKTIN, IISTIN

Urutainsha warinkish najanataj tukamam tujinkiakaitiam? Itiurchat asamtai ishichik ishichik najanashmashim? Yuusa chichame aujsatniush itiurchat aminiaiti tuma asamtai itiura juarkimniaitiaj tu enentaimtsumeash? Ju akankamunmanka Yuusa chichame itiura aujsatniuitiaj tura unuimiatratniuitiaj nu nekaattaji.

1. Yuusa chichamesha urukamtai tuke aujsatniuitiaj?

Yuusa chichamen turutskesha Yuus akupkamu chichaman tuke aujea nuka waras pujuttawai tura ni iwiakmarincha penker pujuttawai. (Yus Kanta [Salmo] 1:1-3 aujsata). Tuke tsawan ishichik ishichik aujsatin juarkitia. Yuusa chichame tuke aujeakum aujuujat nekaptiatme.

2. Yuusa chichame aujuujat nekaptiasam wari itiurkatniuitiam?

Yuusa chichame aujuujat nekaptiasar aujeajnia nui enentaimsatniuitji. Yuus papii aya aujsashtiniaitji antsu tuke esetrar enentaimtustiniaitji (Jusuí 1:8). Yuusa chichame aujeakum junis animiasta: Aujeajna jusha Jehovanunsha warinia jintintra? Aujeajna juna imiatrusnak itiura umikminiaitiaj? Chikich aentsnasha itiura jujaisha jintintiawarminiaitiaj?

3. Yuusa chichame aujsattsam itiura tsawan ankamniaitiam?

Yuusa chichame aujsatin ankan atsawak? Yuusa chichame aujsatai tusar tsawan ankatin yupichuchichuiti. Tuma asamtai Yuusa chichame “Ashí tsawant péṉker túramnia nu wasurkairap” tawai (Ipisiunam [Efesios] 5:16). Yuusa chichame aujsattsam tuke tsawan ankamniaitme. Nukap aents kashik aujin ainiawai. Chikichkia yuruma amikiar ayamainiak aujin ainiawai. Nuyasha chikichkia kashi aujin ainiawai. Amesha urutai aujsamniaitiam?

PENKER NEKAATAI

Yuusa chichame aujuujat nekaptiasar wari itiurkamniaitiam nu nekaatai. Yuusa chichame unuimiatrattsar itiura iwiarnarminiaitiaj nu nekaattaji. Yuusa chichame ti penker nekaattsar wari itiurkamniaitiaj nusha nekaattaji.

Uchi asar apatuk yuatin nakittiaiya nu, uunt ajasrikia nu apatuk yuujat nekaptainti. Aintsan Yuusa chichame yama aujeakur nakitminiaitji tumaitkiusha tsawan nankaamaki weakui aujuujat nekapminiaitji.

4. Yuusa chichame itiurkamea aujuujat nekapminiaitiam

Yuusa chichame aujsatin juarkitin itiurchat aminiaiti. Apatuk nakitiamu ishichik ishichik yukir yuatin unuimiatramniaitji aintsan Yuusa chichame ishichik ishichik aujkir aujuujat nekapminiaitji. 1 Pítiur 2:2, 3 aujsarum juna aujmattsatarum:

Yuusa chichame ishichik ishichik aujeakmeka aujuujat nekapminiashitiam? Amesha waritmea?

Yuusa chichamen aujuujat nekaptiasar natsamaru warinia turawarmia nuna VIDEO iistarum. Turarum juna aujmattsatarum:

VIDEO: Natsamaru ainia Yuus papiin aujas nekaawar aneasaruiti (5:33)

Natsamaru ainiana nu wari itiurchatna nupetkarmia?
Aujsatin yawetkij tusar itiurkarmia?
Yuus papiin aujuujat nekaptiasar warinia najanawarmia?

Jutikiamniaitme:

Yuusa chichame paant nekaamnia tura yamai chichataiya nu chichamjai aarma aujsata. Ame chichammijiain Traducción del Nuevo Mundo akuinkia nu aujsata.
Yaunchuk nankaamasu nekaatasam wakeramu nu aujsam juarkitia. Ju papiinium Jutikiam Yuusa chichame aujsata tana nui iista.
Aujeamna nu anujkata. Yuus papii aujeajna nuna anujkamu tana nui anujkata.
JW Library^®nuisha iista. Celularnum turutskesh computadoranmansha descarga ajasam achiakkumka urutainsha Yuusa chichame aujsamniaitme tura antukminiaitme.
Traducción del Nuevo Mundo unuimiatrattsar najanamu irunna nusha aujsata. Nuinkia mapa tura tabla, diccionario aintiakusha wainkiattame. Nujai Yuusa chichame penker aujuujat nekaptiatme.

5. Yuusa chichame unuimiartasam emka iwiarnarta

Yus Kanta [Salmo] 119:34 aujsarum juna aujmattsatarum:

Yuusa chichame aujtsuk turutskesha Yuusa chichame unuimiartasam emka iwiarnakum urukamtai Yuus seatniuitiam?

Yuusa chichame unuimiatkum wari itiurkatniuitiam?

Akankamu iruneana nui juareamunam aarma iruneana nu mash aujsata.
Yuusa chichame aarma iruneana nusha eakam aujsata tura nui akankamunam aujmateana nujai apatkam iista.
Aimkiattsam shait najanata. Nu turakmeka Yuusa chichame unuitiameana nujai ju papii yupichuch unuimiatrattame.

Jusha nekaata

Testigos de Jehovatisha chikich Yuus papiisha aujniuitji, tumaitkiusha Traducción del Nuevo Mundo nu nekaska aujniuitji. Nuinkia ti paant aarma awai tura Yuusa naarincha pachiawai (jw.org nui aarma iista: Testigos de Jehovasha Yuus papii ni najanamun achiakainiawak?).

CHIKICHKIA JUNIS TINIU AINIAWAI: Yuusa chichame unuimiartinkia itiurchataiti. Ankantan achiaktsujai.

Amesha waritmea?

WARI NEKAAM

Yuusa chichame penker nekaataj tusam urutai aujsattam nu tsawan tesata tura aujeamna nu penker nekaattsam Yuus seata, nuyasha Yuusa chichame unuimiartasam emka iwiarnarta.