AKANKAMU 22

Amesha Yuusa chichame itiura etserkamniaitiam?

ANTUKTIN, IISTIN

Yuusa chichame jintinkrateana nu neka asam chikich aentscha juna nekaawartiniaiti tu enentaimtsumeash. Nuka nekasaiti, ashi aents nekaawartiniaiti. Tumaitkiusha unuimiamna nu chikich aents ujaktin sapijmiamniaitme. Sapijmiamu itiura nupetkamniaitiam nu nekaatai.

1. Unuimiamna nu chikich aents itiura ujakarminiaitiam?

Jesusa unuiniamuri junis tiarmiayi: “Iisha íisjinia nu tura antukjinia nusha ii etsertsuk pujustin tujintiaji” (Túramuri̱ [Hechos] 4:20). Ninkia Yuusa chichame nekainiamun ti shiir enentaimtuinia asar chikich aentsnasha ujaktinian wakeriarmiayi. Amesha ainis enentaimiamek? Nuinkia amee shuar tura amikrum ainiasha Yuusa chichame ujakartasam warinkish turata (Kurusenam [Colosenses] 4:6 aujsata).

Etserkattsam junis turamniaitme

Amee shuar Yuusa chichame ujaktaj tusam ju atsakamutin juna nekaajai timi juarkimniaitme.
Ame amikrum warinmansha ti enentaimkiui ikiakartasam Yuusa chichame aujtusta.
Ame aim takatnumia itiura nankaamasum tu aninmakui Yuusa chichame unuimiatkum nekaamu turutskesha iruntainiam unuimiatramu ujakta.
Ame amikrum ainian jw.org nui itiura enkemawarminiait nu jintintiawarta.
Yuusa chichame unuimiamna nui nemartamsat tusam yaksha ipiata turutskesha jw.org nui enkema Yuusa chichamen unuimiartasa wakerajai tusa itiur seamminiait nu jintintiata.

2. Jehová enentaimtuiniajai urukamtai Yuusa chichame etserkatniuitiam?

Yaunchunia Kristu aentska aya ni nekatairiniak Yuusa chichamenka ujakcharmiayi. Jesuska Yuusa chichamen etserkarat tusa ni unuiniamuri ainian emkitiarum tusa jimiar jimiaran apatak ashi irutkamunam akupkarmiayi (Rúkas [Lucas] 10:1). Penker iruntrar etserkaru asarmatai nukap aents Yuusa chichamen antukarmiayi. Jesusan nemarin armia nu jimiar jimiar etserainiak shiir enentaimiarmiayi (Rúkas [Lucas] 10:17). Jehová enentaimtuinia nujai etserkattsam wakerukta.

PENKER NEKAATAI

Ashamtsuk etserkatai tusar wari turatniuitiaj nu nekaatai.

3. Jehová yainmaktatui

Aentska Yuusa chichame etsereakui wari turutiartin tu enentaimin ainiawai.

Chikichjiai aujmattsattsam kurainkiaitiam? Urukamtai nusha tumaitiam?

VIDEO iisrum juna aujmattsatarum:

VIDEO: “Jehová kakarmaram surusta” timiajai (4:05)

Natsamaru ainia ashamtsuk warinia turawarmia?

Isayas 41:10 aujsarum juna aujmattsatarum:

Yuusa chichame etserkattsam urukamtai Yuus seatniuitiam?

Jusha nekaata

Testigo de Jehová ainiana nuka yaunchukka wisha etserkamniashitiaj tu enentaimin armiayi. Sergey naartin wikia nattsujai tu enentaimia asa chikich aentsjai aujmattsatniun itiurchat enentaimniuyayi. Yuusa chichame unuimiatan juarkimiayi. Sergey junis timiayi: Ashamaknasha wi unuimiatman chikich aentsun ujakarmiajai. Nattsujai tu enentaimtsuk kakaram ajasan Yuusa chichame tana nuna kajinmatchaitjiai.

4. Arankartin ata

Yuusa chichame etsertsuk wari titiatam tura itiur titiatam nui enentaimsata. 2 Timiutéun 2:24 tura 1 Pítiur 3:15 aujsarum juna aujmattsatarum:

Yuusa chichame chikich aents ujakum wari turatniuitiam?
Yuusa chichame etserkumin amee shuarkesha, ame amikrumkesha imian iirmachartatui, turutmainiakui wari itiurkamniaitiam? Tura wari turashtiniaitiam?
Amesha Yuus enentaimtusta tutsuk urukamtai arantamujai aujmattsatniuitiaj?

5. Yuusa chichame etsereakur warawitji

Ni chichamen etserkatniun chichamprukat tusa Jehová Jesusan anaikiaiti. Jesussha nu takatan itiurak enentaimtimia? Juaṉ 4:34 aujsarum juna aujmattsatarum:

Penker yurumar pujakrikia warasar pujutainti. Yuus wakeramu najanatin tura Yuusa chichame etserkatniuka yurumatniua aintsaiti urukamtai Jesús ainis timia?
Yuusa chichame etsereakum urukamtai warasminiaitiam?

Junis turamniaitme

Iruntramu emka achiakeajnia nui Yuusa chichame etserkur aents yama wainkiar waritminiaitiaj nu nekaata.
Amesha iruntramunam pachinkiataj tusam wakerakmeka amin Yuusa chichame unuitiameana nu aniasta. Iruntramunam pachinkiat tusa amasartatna nuka chikich aents Yuusa chichame ujaktinian yainmaktatui.
Ju papiinium Chikichkia junis tiniu ainiawai tana nui iisam aninmainiakui waritminiaitiam nu nekaata.

CHIKICHKIA JUNIS TINIU AINIAWAI: Uruksamea? Puju weamek?