AKANKAMU 36
Ashi warinmansha penkera nu najanawartai
Ashi aents amikri penkeran najanniun takuttsar wakerin ainiawai. Jehovasha aintsan amikruka penkera nuna najanin arat tusa wakerawai. Aents anankartin ainiawai tuma asamtai iisha anankartin aij tusar kakartiniaitji. Anankartichuitkiurkia urukattaj?
1. Urukamtai anankartichu atiniaitiaj?
Jehová aneakrikia tura arantakrikia chikichcha anankainiatsji. Jehovaka ii enentaimian tura ii najanman nekawai (Israernum [Hebreos] 4:13). Anankartichuitkiurninkia Jehovasha shiir iirmastatji. Ni chichamen junis tawai: “Warí Uunt Yuska yajauchin enentáimtinia núnaka muí̱jiawai, antsu esetar wekainia núnaka nekas péṉker amikri̱ya nútikias shiir enentáimtuiniawai” (Nekatai̱n Jintinkiartin [Proverbios] 3:32).
2. Anankartichu asar wari najanatniuitiaj?
Jehovaka “Atumí írutramurmiji̱a̱i̱ nekasa nu chichastarum” turameaji (Sakarías 8:16, 17). Anankartichu asar wari itiurkatniuitiaj? Ii shuarsha tura takatnumsha nuya ii yachisha ii umaisha nuya naamka ainiana nusha ananchaitji. Aents anankartichuka kasamchaiti (Nekatai̱n Jintinkiartin [Proverbios] 24:28 tura Ipisiunam [Efesios] 4:28 aujsata). Nuyasha warinmansha mashiniu akikmaitji (Rúmanam 13:5-7). Warinmansha “Iisha ashí péṉker túratin wakeraji” (Israernum [Hebreos] 13:18).
3. Anankartichuitkiurkia urukattaj?
Anankartichuitkiurninkia chikichcha nekas tiniuyi turamiartatji. Anankartichuitkiurkia ii yachijiaisha ii umaijiaisha penker pujuartatji. Nuyasha anankartichu asar penker enentaimtiatji. Anankartichuitkiurkia Yuusa chichame jintinkratmaka ti penker ujukattaji nuya chikichcha Jehovan enentaimtustasar wakeriarminiaiti (Titiun 2:10).
PENKER NEKAATAI
Anankartichuitkiurkia Yuusa amikri ajasminiaitiajnia nu nekaatai tura warinmansha anankartichu aminiaitiajnia nu nekaatai.
4. Jehovaka aents anankartichu ainian shiir iiniaiti
Yus Kanta [Salmo] 44:20, 21 tura Marakías 3:16 aujsarum juna aujmattsatarum:
-
Warinsha uukar najanamniashitiaj? Urukamtai ainis enentaimiam?
-
Chichakrin nekasa nu takurin Jehová itiurak enentaimprat?
Uchi nekasa nuna tuiniakka ni aparin waramtikiainiawai. Tura aintsan waitrashkurkia Jehová waramtikiaji.
5. Anankartichu tuke atiniaitji
Anankartichu atin yupichuchichuiti tumaitkiusha anankartichu atin penkeraiti. Warinma anankartichu atiniaitiaj? VIDEO iistarum.
Israernum [Hebreos] 13:18 aujsarum itiura anankartichu aminiaitiajnia nuna aujmattsatarum.
-
Ii shuarjai.
-
Takatnum turutskesha unuimiatainiam.
-
Tuinkish pujakur.
6. Anankartichuitkiurkia penker pujuttaji
Anankartichuitkiursha itiurchatka wainkiamniaitji. Yus Kanta [Salmo] 34:12-16 aujsarum juna aujmattsatarum:
-
Anankartichuitkiurkia itiur pujuttaj?
-
Aishman ni nuarijiai anannaiyashkunka nuatnaikiamunam penker pujuartatui.
-
Aents penker takakmainiakuinkia takata nerenniurisha shiir enentaimtuiniawai.
-
Anankartichunka anaikiamu ainiana nusha shiir enentaimtuiniawai.
CHIKICHKIA JUNIS TINIU AINIAWAI: Ishichik waitruatniuka yajauchichuiti.
-
Jehová waitramun nakitniuashit? Urukamtai tu enentaimiam?
WARI NEKAAM
Jehovaka ni amikrinkia warinsha najanainiak tura chichainiaksha anankartichu arat tusa wakerawai.
Awakeasrik nekaatin
-
Warinma anankartichu atiniaitiaj?
-
Nekasa nu uukminiashit?
-
Urukamtai anankartichu atiniaitiam?
NUKAP NEKAATA
Uchirtin ainiasha ni uchirin anankartichu arat tusa itiur jintiawartiniait?
Ni chichakmari umiana nuka urukatta?
Ii kuit akikmamujai yajauchin najanainiakuisha akikmaktiniashitiaj nu nekaata.
Aishman anankartiniaitiat yapajiamia nu nekaata.
Jehovaka penker asa tsankurkartinian nekaamiajai (La Atalaya, 1 de mayo 2015)
