AKANKAMU 38
Iwiakma penker wainkiartai
Iwiaku pujakur warasar pujumniaitji. Itiurchat nankaamakrisha warasar pujumniaitji. Jehová iwiakman amasu asakrin yuminsatai wari turatniuitiaj? Nekassha urukamtai nusha turatniuitiaj?
1. Iwiakmasha urukamtai penker wainkiatniuitiaj?
Iwiakmanka Jehová amasu asakrin penker wainkiatniuitji. Yuuska iwiakman sukartusuiti (Salmo 36:9 TNM). “Warí, imia niṉki Nisha ii iwiaakmari̱n, ii mayattairi̱ncha tura ashí írunna nunasha súramtsujik” tawai Yuus papii (Túramuri̱ [Hechos] 17:25, 28). Iwiaku pujustasar utsumajnia nuna sukartaka Jehovayaiti. Tuma asa iwiaku pujuiniak warasarat tusa warinkish sukartiniaiti (Túramuri̱ [Hechos] 14:17 aujsata).
2. Jehová iwiakman sukartusu asamtai wari itiurkatniuitiaj?
Akinchamiamna nuyan Jehovaka waitmamiayi. David junis timiayi: “Yusru, yama najatmiam nuya̱ṉ akiinmam wáitmiame” (Yus Kanta [Salmo] 139:16). Ame iwiakmarmin Jehová ti shiir iiyawai (Matéu 10:29-31 aujsata). Jehovaka yaksha chikich aentsun maamtainkia tura yaksha ninki maamamtaisha ti najaimiaiti (Jíinkiarma [Éxodo] 20:13). a Nuyasha warinkish maamamnia najankurin ti najaimiakminiaiti. Chikich aents jakarain tusar warinkish turachkurninkia najaimiakminiaiti. Yuus ii iwiakmarin sukartusu asamtai ii iwiakmari penker wainkiatniuitji tura chikichcha iwiakmarisha arantukartiniaitji.
PENKER NEKAATAI
Yuus iwiakman amasu asakrin yuminkiakrikia wari najanatniuitiaj nu nekaatai.
3. Sunkurmakaij tusam iimiasta
Kristu aentska ni iwiakmarijiai Yuus wakerana nuna najanin ainiawai. Ni ayashinkia Yuusan susaru asar penker wainiainiawai. Rúmanam 12:1, 2 aujsarum juna aujmattsatarum:
-
Sunkurmakaij tusam urukamtai penker iimiastiniaitiam?
-
Itiura nusha ainis turamniaitiam?
4. Itiurchat nankaamasaij tusam anearta
Itiurchat nankaamasaij tusar aneartinian Yuusa chichame jintintramji. Itiurchat nankaamasaij tusar wari itiurkatniuitiaj nu nekaattsarum VIDEO iistarum.
Nekatai̱n Jintinkiartin [Proverbios] 22:3 aujsatarum. Itiurchat nankaamasaij tusar wari itiurkamniaitiaj nuna aujmattsatarum.
-
Ii jeen.
-
Takatnum.
-
Warinmansha nakurakur.
-
Carro ewekameakur turutskesha carronam weakur.
5. Uchi akiniatsna nuna iwiakmarisha penker wainkiata
Uchi akiniatsna nuna iwiakmarincha Jehová itiur enentaimtiniait nuna David timiayi. Yus Kanta [Salmo] 139:13-17 aujsarum juna aujmattsatarum:
-
Jehovajaisha aentscha urutai iwiaku atinniasha juarea, akiniamtaiyash turutskesha ni nukuri enketeakuiyash?
Yaunchuk Jehová Israel aentsun chichaman susarmiania nuinkia nuwa ajamtin penker wainkiatniuitrume tu aarma amiayi. Nuyasha uchi akinchasha penker wainkiatniuitrume tu aarma amiayi. Éxodo 21:22, 23 TNM aujsarum juna aujmattsatarum:
-
Yaksha nuwa ajamtinian awaji ashimtikiamtainkia Jehová nu aentsun itiur iiniuya?
-
Antsu yaksha ni wakerus uchi akinchan maamtainkia Jehovash itiurak nekapniuit? b
-
Yuus ainis iiyana nusha amesha warintia enentaimiam?
Nuwa iwiakman arantincha ashimkinkia penker ainjiai tu enentaimminiaiti. Isayas 41:10 aujsarum juna aujmattsatarum:
-
Ashimkit tusar utsuniamka yana aujsatniuit? Urukamtaiya?
CHIKICHKIA JUNIS TINIU AINIAWAI: Ashimkitniuka yajauchichuiti.
-
Nuwa ajamtin iwiakmarin tura uchi akintsuna nuna iwiakmarincha Jehová ti shiir enentaimtawash?
WARI NEKAAM
Iwiakmanka Jehová amasuitji. Iwiakma arantuktin tura penker wainkiatin nuyasha aneastinian Yuusa chichame jintintramji.
Awakeasrik nekaatin
-
Jehovaka aentsu iwiakmarin penker enentaimtiniaiti urukamtai ainis timiniaitiaj?
-
Yaksha ni wakerus maamamtainkia turutskesh yanaksha maamtainkia Jehovasha itiur enentaimniuit?
-
Yuus iwiakman amasuitiajnia nusha wari urukamtai ti shiir iiyam?
NUKAP NEKAATA
Jehová ii iwiakmari amasu asakrin itiur yuminsatniuitiaj?
Jehová ii iwiakmarin amasu asakrin yuminsajme taji (nampet 141) (2:41)
Yaunchuk ashimkinniasha Jehová tsankuramniashit?
Ashimkitniuncha Yuusa chichame wari ta? (jw.org nui aarma irunu)
Iwiakman penker iiyatsna nuna Jehová itiur iiya?
Jakamniaitiajnia nui nakurustiniashitiaj? (¡Despertad!, 8 de octubre 2000)
Maamattsa wakeruiniana nuna Yuusa chichamesha warintiawak nu nekaata.
Maamatniun enentaimiamun Yuusa chichame yainkiamniashit? (jw.org nui aarma irunu)
a Ti waitsar pujuiniana nunasha Jehovaka kajinmattsui (Yus Kanta [Salmo] 34:18). Yaksha maamamnia nekapea itiur enentaimia nunaka Jehová nekawai. Maamamnia nekapainiana nuna Jehová yaintasa wakerawai. Maamatniun enentaimiamun Yuusa chichame yainkiamniashit? tana nui aujsata. Ju akankamunam Nukap nekaata tana nui awai.
b Yaunchuk ashimkiaru ainiana nu tunaan turaitjiai tu enentaimiu pujuchartiniaiti. Jehovaka tsankukratniuiti. Ashimkitniuncha Yuusa chichame wari ta? tana nui aujsata. Ju akankamunam Nukap nekaata tana nui awai.
