Nuwa ni uchirin unuimiatainiam akupkattsa itiurniuit nui enentaimsata. Ni uchiri unuimiatainiam weatsain maiyash tusa tura pushincha wapikchan entsariash tusa ni uchirin iiniaiti. Nukuri ainis wainiam uchikia sunkurmakchattawai tura ni nukurisha penker wainniuiti tu enentaimsartatui. Jehovaka ii apari asa anenmaji. Tuma asa wapikcha arat tusa wakerawai nuyasha yajauchin najanawarain tusa nakitiawai. Wapikchaitkiurkia yajauch aujmatramsachartatji tura Yuussha penker ujukattaji.

1. Ii ayashin tura ii jeencha wapikcha aij tusar wari itiurkatniuitiaj?

Jehová turamji: “Wi penkera nuna turin asamtai, atumsha penkera nu turin atiniaitrume” (1 Pedro 1:16 TNM). Penkera nuna turin ataj takurkia wapikcha tura yajauchin najancha atiniaitji. Kashi kashinin maakur wapikcha atatji, carrosha, ii jeesha tura ii pushirish nankamsar tsuatmakar achiakchakur wapikcha atatji. Nuyasha ii iruntairi japimkiatin yaimkiatniuitji. Wapikchaitkiurninkia chikich aentscha Jehovan paant amajsartatui (2 Kurintiunam 6:3, 4).

2. Yuus nakitrampraij tusar wari turashtiniaitiaj?

Yuus papii turamji: “Nu tuma asamtai ii aya̱shi̱ tura ii enentái̱sha yajauch ajasá̱i̱ṉ tusar ashí tunáa ana nuyá̱ kanaktiniaitji” (2 Kurintiunam 7:1). Ii ayashin tura ii enentain emesturmakminiaitiajnia nu nakitniuitji. Ii penker enentaimkiurin Jehová warasat tusar kakartiniaitji (Yus Kanta [Salmo] 104:34). Nuyasha chichakrisha yajauch chicham chichakchatniuitji (Kurusenam [Colosenses] 3:8 aujsata).

Penker atai tusar warimpia najanashtiniaitiaj? Tsaank, coca nuke tura droga ii ayashin emesturmakminiaitji. Nuka nakitratniuitji. Nu turakur ii ayashisha penker wainiaji nuya ii iwiakmarisha arantaji. Nuyasha yajauchi enentaimsar ii ayashi takamaschatniuitji tura tsanirmamu iischatniuitji (Yus Kanta [Salmo] 119:37; Ipisiunam [Efesios] 5:5). Yajauchia nu najantai iniaisatin itiurchataitkiuisha Jehová yainmaktatui (Isayas 41:13 aujsata).

 PENKER NEKAATAI

3. Ii ayashin ii jeen wapikchaitkiurkia Jehová paant amajsattaji

Israel aents wapikcha atai tusar wari itiurkartiniuya nuna aarma aujeakur Yuuska wapikcha arat tusa wakerana nu nekaamniaitji. Jíinkiarma [Éxodo] 19:10 tura 30:17-19 aujsarum juna aujmattsatarum:

• Ii ayashisha uruku atiniait?

• Wapikcha atai tusar wari itiurkatniuitiaj?

Wapikcha atai tusar kakartiniaitji. Kuitrintin turutskesha kuitrincha akursha wapikcha atiniaitji. VIDEO iisrum juna aujmattsatarum:

• Ii warinkisha achiakeajnia nu wapikchaitkiuinkia aents Yuusa chichame ujainiajnia nusha Jehovan arantukarminiashit? Nusha urukamtai?

4. Yajauch najantairam iniaisata

Tsaank turutskesha droga mukunniuitkiumka nu iniaisatin yupichuchichuana nu nekame. Nu iniaisattsam amin itiurchat amajtamea nui enentaimsamniaitme. Rúkas [Lucas] 10:27 aujsarum tsaank tura droga mukuneamu itiura itiurchat amajkartusminiait nuna aujmattsatarum:

• Tsaank turutskesha droga mukuneakrinkia Jehová itiura iirmasminiaitiaj?

• Ii shuarsha itiur waitsarminiait?

Tsaank turutskesha droga mukuneamu iniaisattsam wari itiurkamniaitiam nui enentaimsata. a VIDEO iistarum.

Ipisiunam [Efesios] 1:19 aujsarum juna aujmattsatarum:

• Aents tsaankun turutskesha drogan mukunin Yuusan tuke seak, Yuusa chichamen unuimiak, iruntainmasha pachiniak, nuna mukunatniun iniaisamniashit? Urukamtai tu enentaimiam?

 5. Yajauch enentaimmia tura yajauch najanma iniaisattsam kakarta

Kurusenam [Colosenses] 3:5 aujsarum juna aujmattsatarum:

• Warinmaninsha misu tsanirmamu iistin, misu foto jusar akupeamun tura ii ayashi yajauchi enentaimsar takamun urukamtai Jehová nuna nakitia?

• Yajauchia nu turawairap Jehová turameajnia nu umiktin penkerashit? Urukamtai tu enentaimiam?

Yajauch enentaimmia nupetkattsar wari itiurkatniuitiaj nu nekaata. VIDEO iistarum.

Yajauchia nu najanawaij tusar wari najanatniuitiaj nuna Jesús jintinkratamiayi. Matéu 5:29, 30 aujsarum juna aujmattsatarum:

• Jesuska atumi ayashi tsupikia ajapatniuitrume tusa ainis tichamiayi. Antsu yajauchia nu najanawaij tusar wari itiurkatniuitiaj nuna taku ainis timiayi. Yajauchia nui enentaimsaij tusar wari turatniuitiaj? b

Yajauchia nui enentaimsaij tusam kakamna nuna Jehová nekawai. Yus Kanta [Salmo] 103:13, 14 aujsarum juna aujmattsatarum:

• Ju aujsamna nu yajauch najanashtinian yainmakminkiait? Nusha urukamtai tame?

 WARI NEKAAM

Ii ayashi wapikchaitkiur penkera nu enentaimkiur nuya penker iniakmamkur Jehová waramtiksattaji.

Awakeasrik nekaatin

• Wapikcha atincha urukamtai penkerait?

• Ii ayashin tura ii jeen wapikcha atasar wari itiurkatniuitiaj?

• Penkera nu najanattsar tura penkera nui enentaimsattsar wari turatniuitiaj?