Nukap aents ni amikrijiai awartiun urutainsha umin ainiawai. Tura chikichkia awartiun penke umartinian nakitin ainiawai. Tura chikichkia nampemam awartiun umin ainiawai. Yuusa chichamesha awartiununcha wari ta?

1. Awarin umartin yajauchiashit?

Yuusa chichamenka awarin umartinkia yajauchiti tatsui. Yuus papiiniumka “vino aentsu enentain waramtikniuiti” tawai tura nuka Yuus amasmaiti (Salmo 104:14, 15 TNM). Nuyasha nuwa tura aishman Yuusan enentaimtincha awartiun umin armiayi tawai Yuusa chichame (1 Timiutéun 5:23).

2. Awartiun umuiniana nuna Yuusa chichamesha wari ta?

Nampektinkia tura awarin ti nukap umartinkia yajauchiti tawai Jehová (Gálatas 5:21 TNM). Vinon ti umin ainia nujai tsaninkiaip tawai Yuus papii (Nekatai̱n Jintinkiartin [Proverbios] 23:20). Iik pujusar turutskesh chikich aentsjai pujusar awarin umakrisha ti nukap umarchatniuitji. Nampeakrikia nankamas turattaji tura nankamas chichaktatji nuya penker enentaimsatin jeashtatji. Awarin ti umakrikia sunkurmakminiaitji. Nukap umartin wakerua wakerua ajakrikia awarin umartin iniaisatniuitji.

3. Chikich najanainiamu arantakrikia wari turashtataj?

Awarin umartajiash nuka iik enentaimsatniuitji. Yaksha awartiun ishichik umakuinkia yajauch enentaimtuschatniuitji. Turutskesha yaksha awartiun umartinian nakitiakuinkia utsukchatniuitji (Rúmanam 14:12). Awarin umakrin chikich yajauch enentaimsamniaitkiuinkia umarchatniuitji (Rúmanam 14:21 aujsata). Yuus papii tawai: “Áya niniak péṉker átatna nunak shuar túrashti. Antsu chíkich shuar yáiṉminia nuna túrati” (Jiripiusnum [Filipenses] 2:4 aujsata).

 PENKER NEKAATAI

4. Awarin umartajash tusam enentaimsata

Awarin umartinniasha Jesús itiur iiniuya? Nu nekaattsar Jesús turamiania nui enentaimsatai. Juaṉ 2:1-11 aujsarum juna aujmattsatarum:

• Awartiun umuiniana nuna Jesús yajauch iiyawash?

• Jesuska awarin umartin yajauchiti tichamiayi tuma asamtai yaksha awartiun umakui iisha itiur enentaimsatniuitiaj?

Awartiuka umarminiaitji tumaitkiusha urutai umarchatniuitiaj nui enentaimsatniuitji. Nekatai̱n Jintinkiartin [Proverbios] 22:3 aujsarum urutai awarin umarchatniuitiaj nuna aujmattsatarum:

• Carro turutskesha maquinaria ewekamsattakum.

• Ajamtiniaitkium.

• Doctor awarin umaraip takui.

• Awarin nukap umartin katsuntratin jeachkum.

• Aents anaikiamu eketainiana nu awarin umarairap tuiniakui.

• Yaunchuk nampe wemiania nujai pujakum.

Nuatnaiyamunam turutskesha namper najanmanum awarin sukartustiniashitiam? Warinma enentaimsatniuitiaj nu nekaattsarum VIDEO iistarum.

Rúmanam 13:13 tura 1 Kurintiunam 10:31, 32 aujsatarum. Jui Yuusa chichame aarma ana nu chikichkimsarum aujsarum juna aujmattsatarum:

• Jui Yuusa chichame aarma ana nusha penker enentaimsam turatniun itiura yainmakminiait?

 5. Nukapka umarchattajai tu enentaimsata

Awarin umakmeka ti nukap umamun Jehová nakitiana nui enentaimsata. Nusha urukamtai? Oseas 4:11, 18 TNM aujsarum juna aujmattsatarum:

• Aents awartiun ti umakka urukamniait?

Ti nukap umarchatniuncha wari yainmakminiaitiaj? Urutma umarminiaitiaj nu nekaatniuitji. Nekatai̱n Jintinkiartin [Proverbios] 11:2 aujsarum juna aujmattsatarum:

• Awarin urutma umartataj nuisha urukamtai enentaimsatniuitiam?

6. Nampektin iniaisata

 WARI NEKAAM

Yuuska awartiun umarar shiir enentaimsarat tusa amasuitji. Tumaitkiusha Jehovaka nampekarain tusa nakitiawai.

Awakeasrik nekaatin

• Umarar nampetai ainiana nuna Yuusa chichame warintiua?

• Nampeakrikia urukamniaitiaj?

• Awartiun umuiniana nu tura umuiniatsna nusha arantakrikia wari itiurkatniuitiaj?