AKANKAMU 44
Namper iruneana nu Yuusjaisha mashiash penker ainia?
Jehovaka warasar pujuarat tusa wakerawai tura urutainsha nampermawarat tusa wakerawai. Nampermatai irunna nuna Yuus mashiniuash penker iiya? Jehová aneakrikia shiir enentaimtiksattsar wari turatniuitiaj?
1. Nampermatai ainiana nuna Jehová urukamtaiya mashiniuka penkercha ainiawai ta?
Yuusa chichame unuimiatram namper yajauch irunusha nekaattame. Nu nampernaka antar religión namperma ainiawai. Nu namperka Iwianchnia nampermatai arminiaiti. Turutskesha nu namperka aents jakasha iwiaku pujawai tu enentaimsar nampermarminiaiti. Nu nampernum najanainiamuka itiurchat nankaamasaij antsu penker pujai tusar najanin ainiawai (Isayas 65:11). Tuma asamtai niya kanaktiarum tura yajauchia nusha antinkiairap tawai Jehová (2 Kurintiunam 6:17). a
2. Aentsun paant amajsattsar namperan najatainiana nunasha Jehová itiur enentaimta?
Jehovaka aents yainkiattawai tu enentaimsairap turamji, wari nuka antraiti (Jirimías 17:5 aujsata). Uunt naamkaru armiania nunan namperi najantaish iruneawai. Chikichkia tarachin tura escudon turutskesha ni irutkamuri namperin najanin ainiawai (1 Juaṉ 5:21). Tura aintsan politicanuncha namperma ainiawai. Tura chikich nampersha iruneawai. Aents paant amajsattsar namper najankurin turutskesha matsatkamu namperi najankurin Jehovasha itiurak enentaimminiait?
3. Nampernum urukamua yajauchit?
Nampernum nankamsar najanainiak ti umamuka yajauchiti tawai Yuusa chichame (1 Pítiur 4:3). Nampernum aents charaa ajausha iruneawai. Nuya yajauch iniakmamniush iruneawai. Jehová amikri ajastaj takurkia nu tumainiamunam pachinkiashtiniaitji.
PENKER NEKAATAI
Jehová waramtiksattsam namperan najanainiakui wari itiurkamniaitiam nu nekaatai.
4. Nampernum Jehová arantuiniachmanum pachinkiaip
Rúmanam 12:2 aujsarum juna aujmattsatarum:
-
Warinsha nampermattsam itiur enentaimsatniuitiam?
-
Ame pujamna nuisha warinia namperma ainia?
-
Nu nampermamun Jehová penkerash iiya?
Cumpleaños najanman Yuussha itiurak enentaimta? Yuusa umirniuka cumpleañosnum pachinkiaiti tamaka Yuusa chichamenka atsawai. Antsu Jehová umircha armia nu cumpleaños najanin armiayi tawai. Náṉkammari̱ [Génesis] 40:20-22 nuya Matéu 14:6-10 aujsatarum. Turarum juna aujmattsatarum:
-
Cumpleaños najanmanum wari nankaamasmia?
-
Ausajnia jui enentaimsam cumpleaños Jehovasha itiur enentaimta?
Cumpleañosnum tura Yuus nakitiana nu nampernum pachiniakui Yuus kajertukminiashit tu enentaimtsumeash. Jíinkiarma [Éxodo] 32:1-8 aujsatarum. Turarum VIDEO iisrum juna aujmattsatarum:
-
Warinsha turutsuk Jehová juna wakerawash tusar urukamtai iinkia enentaimsatniuitiaj?
-
Nusha itiurkaria turatniuitiaj?
Nampermamun Yuus penkerash iiya nu itiur nekaamniaitiaj?
-
Yuus papiinium nuna jintinkrateawak? Nu nekaattsam nu nampermamu tunia jintrait nu nekaata.
-
Aentsun, matsatkamun, tarachin turutskesha escudon paant amajsattsar namperan najanainiawak? Iikia aya Jehovak paant amajeaji tura Yuus ju nunkanam itiurchat irunna nunasha iwiarattawai tu enentaimiaji.
-
Nu nampernum Yuus nakitiamun najanainiawash? Iikia yajauchia nu najancha atiniaitji.
5. Aranturkarat tusam ame enentaimmia paant jintiata
Pachinkiata amajtamainiakrinkia pachinkiashtatjai tichamnia aminiaiti. Kajetsuk arantamujai urukamtai pachinkiashtatam nu jintiata. Chikichcha itiurkait nu nekaattsarum VIDEO iistarum.
Matéu 7:12 aujsarum juna aujmattsatarum:
-
Amee shuar nu nampernumka pachinkiashtiniaitme titiniashitiam?
-
Nampernum pachinchakmesha amee shuar anenakmeka wari turatniuitiam?
6. Jehovaka warasar pujusarat tusa wakerawai
Jehovaka ni shuarijiai tura ni amikrijiai warasar nankaamasarat tusa wakerawai. Eclesiastés 8:15 TNM aujsarum juna aujmattsatarum:
-
Urukamtai Jehová waras pujusarat tusa wakerawai taji?
Jehovaka iruntrar warasar nankaamasarat tusa wakerawai. Uunt tuakmanum yaja nunkanmaniajai iruntrar penker nankaamatainti. Nu nekaattsarum VIDEO iistarum.
Karaseanam [Gálatas] 6:10 aujsarum juna aujmattsatarum:
-
Aya nampernumkek warinsha sunaisatniuitiaj?
-
Iik wakerusar warinsha susatin urukamtai penkerait?
-
Testigo de Jehovasha uchirijiai waras nankaamastasar warinkish najanin ainiawai. Nui warinkish su ainiawai. Uchirtiniaitkiumka amesha wari najanamniaitiam?
CHIKICHKIA JUNIS TINIU AINIAWAI: Nu namper yajauchiti tumaitkiusha ii shuarjai ii amikrijiaisha iruntrar nankaamakrikia warinchuiti.
-
Amesha warintinmek?
WARI NEKAAM
Jehovaka ni shuarijiai tura ni amikrijiai warasar nankaamasarat tusa wakerawai. Antsu Jehová nakitiana nu nampernum pachinkiashtiniaitji.
Awakeasrik nekaatin
-
Jehová nu namperan penkerash iiya tusar warintia enentaimsatniuitiaj?
-
Ii shuari nuya ii amikri nu nampernum urukamtai pachintsuj tusar itiur jintiatniuitiaj?
-
Jehovaka warasar nankaamasarat tusa wakeriniaiti urukamtai taji?
NUKAP NEKAATA
Kristu aents wari namperna najancha ainia nu aujsata.
Testigos de Jehová namper irunna nuna nampermau ainiawash? (jw.org nui aarma irunu)
Yuussha urukamtai cumpleaños najanman nakitia nu nekaata.
Testigos de Jehovasha urukamtai cumpleañon najancha ainia? (jw.org nui aarma irunu)
Warinkish namperan najanainiakui uchisha Jehovan itiura waramtiksarminiait nu iista.
Kristu aentska Navidad najanmanum pachincha ainiawai tura nuna turuiniak shiir enentaimiainiawash?
