AKANKAMU 47

Imianminiashitiam?

ANTUKTIN, IISTIN

Imianminiashitiam?

Yuusa chichame unuimiatra asam Jehová ti nekame. Jehová neka asam yajauch najantairmesha iniaiki weatsmeash. Tumaitkiusha warinsha Yuusai sumamsashmin turutskesha imianchamnia amajtameatsuash. Ju akankamunam imiantiasa chikichcha wari itiurchatna nupetkaruit nu nekaattame. Amesha wari najanamniaitiam nusha nekaattame.

1. Imiantiasam Yuusa chichame mashi neka atinkiaitiam?

Imiantiasa wakeruiniaka nekas chichaman nekaawartiniaiti (1 Timiutéun 2:4). Ya imiantiasa wakera nuka Yuusa chichamen mash nekaatniuiti tatsuji. Kristu aents yaunchuk imianin ainiaksha nisha nekaki wenawai (Kurusenam [Colosenses] 1:9, 10). Antsu Yuusa chichame tana nu paant nekaatniuitme. Yuusa chichame unuimiatmena nuna paant nekaki weameash tusar uuntri anairamu aninmasartatui.

2. Imiantiasam wari turatniuitiam?

Yuus papii junis tawai: “Wats, yamaikia atumí yajauchiri̱ya̱ ené enentáimia ajasrum kanaktiarum. Túrarum tunaarun asakárat tusarum Yusai̱ni̱ apajá̱rtarum” (Túramuri̱ [Hechos] 3:19, 20 aujsata). Imiantsuk nuka turatniuitme. Imiantiaj takumka yajauch najanamuram ene enentaimia ajasam Jehová tsankurturta titiniaitme. Tura aintsan yajauch najantaisha iniaisam Yuus wakerana nuna najanatjai tu titiniaitme. Nuyasha aintsan testigos de Jehová iruntramurin pachinkiatniuitme tura nijiai Yuusa chichame etserkatniuitme.

3. Tunaamkamniaitjiai urukamtai tu enentaimsashtiniaitiam?

Yajauchi najanan Jehová umirkachaij tu enentaimniusha irunainiawai. Amesha tunaamkamniaitme. Yaunchuksha Yuusa umirin ainiayat nuwa tura aishmansha tunaamkarmiayi tawai Yuusa chichame. Jehovaka Kristu aentska penke awajichu artiniaiti tatsui (Yus Kanta [Salmo] 103:13, 14 aujsata). Jehová tana nu umiktasam kakakminkia warastatui, nuyasha yainmaktatui. Yuusa chichamen tawai: “Yusa aneṉkrattairi̱ya̱ peṉké akantámkichminiaitji” (Rúmanam 8:38, 39 aujsata).

PENKER NEKAATAI

Wari najankumea imianminiaitiam nu nekaatai.

4. Jehová urukuit nu nekaata

Jehová aneasam umirkataj takumka penker nekaatniuitme. Yuusa chichame unuimiainia warinia najanawarmia nu nekaataj tusarum VIDEO iistarum. Turarum juna aujmattsatarum:

VIDEO: Imiantiasar warinia najanawarmia (3:56)

Imiantiasar warinia najanawarmia?

Rúmanam 12:2 aujsarum juna aujmattsatarum:

Yuusa chichame jintinkrateana nu nekasashit tu enentaimiamek? Testigo de Jehová nekasa nuna jintinkratainiawai tu enentaimiamek?
Testigo de Jehová jintinkratainiana nu nekasashit tu enentaimkiumka wari turatniuitiam?

5. Itiurchat wainkiamsha katsuntrata

Jehovai sumamsar imianirkia mashiniu itiurchatka waintainti. Ii umai itiur kakarmia nu nekaataj tusarum VIDEO iistarum. Turarum juna aujmattsatarum:

VIDEO: Jehová aneakrikia warinkish itiurchatcha nupetkattaji (5:22)

Narangerel testigo de Jehová ajastasa warinia turamia?
Urukamtai itiurchatan nupetkamia?

Nekatai̱n Jintinkiartin [Proverbios] 29:25 nuya 2 Timiutéun 1:7 aujsarum juna aujmattsatarum:

Itiurchat wainkiarsha wari turakria kakarminiaitiaj?

6. Jehová yainkiattawai tu enentaimsata

Ni umirkatniunka Jehová yainmaktatui. VIDEO iisrum juna aujmattsatarum:

VIDEO: Jehová yainmaktatui (2:50)

Yuusa chichame unuimia urukamtai imiantinian wakerichmia?
Urukamtai Jehová yainkiattawai tu enentaimsamia?

Isayas 41:10, 13 aujsarum juna aujmattsatarum:

Yuusan umirkachminiaitjiai urukamtai tu enentaimsashtiniaitiam?

7. Jehová anenma asamtai yuminsata

Jehová anentawapi tu enentaimkiumka ti yuminsattame nuya ni tuke umirkattsam wakerittiame. Yus Kanta [Salmo] 40:5 aujsarum juna aujmattsatarum:

Jehová urukamtai yuminsatniuitiam?

Jeremías Jehovan anemiayi nuya ni chichamencha shiir enentaimtimiayi. Tura Jehovan takarniuitjiai tu enentaimniuyayi. Ninkia junis timiayi: “Ame chichammeka winia shiir enentáimtikrawai antsu enentái̱rui̱ṉkia waraajai. Warí, Ashí Akupin Uunt Yusá Ame náarmin wikia untsukmaitjiai” (Jirimías 15:16). Ju anintramu aimkiata: