Jesuska “ni shuarin emtuki juiniawai” (Efesios 5:23 TNM). Jesuska nayaimpiniam pujus yamaikia “esetar enentaimias penker takakmaun” ni shuarin yainkiarat tusa utsuawai (Mateo 24:45 TNM aujsata). ‘Esetar enentaimias penker takakmaunka’ Jesús anaikiaiti tuma asamtai umirkatniuitji. Tumaitiatsha Jesusa takarniuriyaiti tura Jesusa yachi ainian yayawai. ‘Esetar enentaimias penker takakmau’ yakit? Itiura waitmaj?

1. ‘Esetar enentaimias penker takakmau’ yakit?

Jehovaka niniu ainiana nuna wainkiarat tusa chikichki aentsun turutskesha nukap aentsun anaikiaiti (Marakías 2:7; Israernum [Hebreos] 1:1). Jesús nayaimpiniam wematainkia Jesusa nemarniuri apóstoles armiania nu tura Jerusalennumia uuntri anairamu armiania nusha Kristu aentsnaka wainiarmiayi (Túramuri̱ [Hechos] 15:2). Yamaisha aintsan warumchik uuntri anairamu Testigos de Jehová takatrin irunturar chichamprin ainia Yuusa chichame etserkatniun chichampruiniawai. Tura Yuusnan jintintramin ainiaji. Ninkia ‘esetar enentaimias penker takakmau’ tutainti. Tura Jesús ainis takakmasat tusa apujsaiti (Mateo 24:45 TNM). Testigos de Jehová takatrin irunturar chichamprin ainiana nuka Yuusa kakarmarijiai anaikiamu ainiawai. Ninkia Jesusjai nayaimpiniam anaikiamu atinian nakasar pujuiniawai.

2. Esetar enentaimias penker takakmausha wariniuna jintintramniuitiaj?

Esetar enentaimias penker takakmauka chikich Kristu aents “utsumainiakui ayurawarat tusa” Jesús anaikiaiti (Mateo 24:45 TNM). Apatuk yuakrikia kakaram nekaptainti tura warik sunkurmashtainti. Aintsan Yuusnan unuimiatki weakur Yuus tuke umirkattsar kakartatji. Nuyasha Yuusa chichame etserkatarum Jesús timiania nusha umiktatji (1 Timiutéun 4:6). Iruntramunam, uunt tuakmanum tura papii irunna nui nuya video iiyakur Yuusna nukap nekaki weminiaitji. Nuyasha Jehová wakerana nusha nekaamniaitji. Tura Jehová amikrisha tuke atatji.

 PENKER NEKAATAI

3. Jehová enentaimtuiniaka penker iruntrar pujuartiniaiti

Jesuska Testigos de Jehová takatrin irunturar chichamprin ainiana nuna emtikiawai. Yaunchunia Kristu aentscha ainis iruntraru armiayi. VIDEO iistarum.

1 Kurintiunam 14:33, 40 aujsarum juna aujmattsatarum:

• Jehová enentaimtuinia penker iruntraru artinkiait? Urukamtai tu enentaimiam?

4. Ii takatrin irunturar chichamprin ainia Yuusa chichame etserkatniun chichampruiniawai

Kristu aents yaunchukka Yuusa chichame nukap etseriarmiayi. Túramuri̱ [Hechos] 8:14, 25 aujsarum juna aujmattsatarum:

• Yaunchuk Yuusa chichame etserkatniun yaki chichamprin armia?

• Kristu aentsun emtin armiania nu akupkaram Pedro Juanjai warinia turawarmia?

Testigos de Jehová takatrin irunturar chichamprin ainiaka Yuusa chichame etserkatniunka chichampruiniawai. VIDEO iistarum.

 Jesús Yuusa chichame etserkatniuitji timiayi. Márkus 13:10 aujsarum juna aujmattsatarum:

• Testigos de Jehová takatrin irunturar chichamprin ainiana nusha urukamtai nekaska Yuusa chichame etserkatniun aujmatin ainia?

• Testigos de Jehová takatrin irunturar chichamprin ainiana nu Yuusa chichame etserkatniun urukamtai chichamprukartiniait?

5. Testigos de Jehová takatrin irunturar chichamprin ainiana nuka jintintramainiaji

Testigos de Jehová takatrin irunturar chichamprin ainiana nuka ashi nunkanam testigos de Jehová matsatainiana nuna jintintiainiawai. Kristu aents warinia najanawartiniait nuna titiasar warinia turin ainia? Yaunchuk Kristu aentsun wainkiartasar irunturar chichamprin armiania nu itiurin armia nu nekaatai. Túramuri̱ [Hechos] 15:1, 2 aujsarum juna aujmattsatarum:

• Pablo Bernabejai chikich Kristu aents armiania nujaisha urukamtai kakaram chicharnaikiarmia?

• Nu chichaman iwiarartasar Pablo, Bernabé nuya chikich Kristu aents armia nusha yajaiya aujmattsarmia?

Túramuri̱ [Hechos] 15:12-18 nuya 23-29 aujsarum juna aujmattsatarum:

• Yaunchu Kristu aentsun wainkiartasar irunturar chichamprin armiania nu chichaman iwiarattsar Yuus yainkratkat tusar itiurkarmia? (Akantramuri 12, 15 nuya 28 iistarum)

Túramuri̱ [Hechos] 15:30, 31 nuya 16:4, 5 aujsarum juna aujmattsatarum:

• Ni takatrin irunturar chichaman akupkarmatai Kristu aents umirkarmiashia?

• Kristu aents nu chichaman uminiakui urukawarmia?

2 Timiutéun 3:16, 17 nuya Sántiak 1:5 aujsarum juna aujmattsatarum:

• Testigos de Jehová takatrin irunturar chichamprin ainiana nusha Kristu aentsun chichaman akuptukartasa iinkia warinia turin ainia?

 WARI NEKAAM

‘Esetar enentaimias penker takakmauka’ Testigos de Jehová takatrin irunturar chichamprin ainiana nu ainiawai. Ninkia Jesús anaikiamu ainiawai. Ninkia Kristu shuar ashi nunkanam irunna nuna Yuusnan unuiniainiawai nuya chichaman ujainiawai.

Awakeasrik nekaatin

• “Esetar enentaimias penker takakmaun” ya anairait?

• Testigos de Jehová takatrin irunturar chichamprin iin yainmaktai tusar warinia turin ainia?

• ‘Esetar enentaimias penker takakmauka’ Testigos de Jehová takatrin irunturar chichampruiniana nu ainiawai tamek?